ଚୋରା ଡିଜେଲ୍ ଚାଲାଣ ବେଳେ ଜଳିଗଲା କଣ୍ଟେନର ସହ ୨ଟି ଟ୍ରକ୍ ….
1 min read
ପାରାଦ୍ୱୀପ ; କଣ୍ଟେନର ଭିତରେ ଥିଲା ଶହ ଶହ ଲିଟର ଚୋରା ଡିଜେଲ। ବିଳମ୍ବିତ ରାତିରେ ଲାଗିଲା ନିଆଁ। ହୁତୁ ହୁତୁ ହୋଇ ଜଳିଗଲା ଚୋରା ଡିଜେଲ ଥିବା କଣ୍ଟେନର ସମେତ ଦୁଇଟି ଟ୍ରକ । ବିଳମ୍ବିତ ରାତିରେ ଏହି ଚୋରା ତେଲ ଗଛିତ ଥିବା କଣ୍ଟେନର ରେ ନିଆଁ ଲାଗିବା ଫଳରେ କଣ୍ଟେନର ସମେତ ନିକଟରେ ଗ୍ୟାରେଜରେ କାମ ହେବାକୁ ଥିବା ଦୁଇଟି ଟ୍ରକର ଇଂଜିନ ସମ୍ପୂର୍ଣ ଭାବରେ ଜଳିପୋଡି ପାଉଁଶ ହୋଇଯାଇଛି । ଏଭଳି ଏକ ଘଟଣା ପାରାଦ୍ୱୀପ କୁଜଙ୍ଗ୍ ଅଞ୍ଚଳରୁ ସାମ୍ନାକୁ ଆସିଛି।
ଗତକାଲି ରାତି ଦୁଇଟା ରୁ ସାଡେ ଦୁଇଟା ମଧ୍ୟରେ ଚୋରାତେଲ ଭରା କଣ୍ଟେନର ରେ କୌଣସି କାରଣବଶତଃ ନିଆଁ ଲାଗିବା ଫଳରେ କଣ୍ଟେନର ଓ ଦୁଇଟି ଟ୍ରକ ରାସ୍ତା ପାର୍ଶ୍ଵରେ ଜଳୁଥିବା ଖବର ପାଇ କୁଜଙ୍ଗ ଅଗ୍ନିଶମ ବିଭାଗ ଓ ପାରାଦ୍ୱୀପ ଅଗ୍ନିଶମ ବିଭାଗ ର ୪ ଟି ଗାଡି ଘଟଣା ସ୍ଥଳ ରେ ପହଞ୍ଚି ନିଆଁ କୁ ଆୟତ୍ତ କରିଛନ୍ତି । ଅଗ୍ନିଶମ ବିଭାଗ ସହିତ ପୋଲିସ ପହଞ୍ଚି ନିଆଁ କୁ ଆୟତ୍ତ କରିବା ପରେ ଘଟଣା ର ଅନୁସନ୍ଧାନ ଜାରି ରଖିଛି ।
ତେବେ ଏହି ଚୋରାତେଲ ବେପାର କାରଣରୁ ଦୁଇ ଦୁଇଟି ଟ୍ରକ ମାଲିକ ଙ୍କୁ ଲକ୍ଷାଧିକ ଟଙ୍କାର କ୍ଷତି ସହିବାକୁ ପଡିଛି । କଣ୍ଟେନର ରେ ଥିବା ପ୍ଲାଷ୍ଟିକ ଜାର ଓ ସିଣ୍ଟେକ୍ସ ପାଣି ଟାଙ୍କିରେ ତେଲ ରଖାଯାଇଥିଲା ଓ ନିଆଁ ଲାଗିବାରୁ ତାହା ସମ୍ପୂର୍ଣ୍ଣ ଜଳିଯାଇଛି। ଏବେବି କଣ୍ଟେନର ରେ ଥିବା ଲୁହା ବ୍ୟାରେଲ ରେ ନିଆଁ ଜଳୁଛି।
