ଗଣେଶ ଭସାଣି ବେଳେ ଯୁବକଙ୍କ ଆଖି ନଷ୍ଟ କରିଦେଲେ ୩ ଦୁବୁର୍ତ୍ତ …
1 min read
ଆଠଗଡ଼ ; ଗଣେଶ ଭସାଣିରେ ଆଖିହରାଇଲେ ଯୁବକ । ଗଣେଶ ଭଷାଣିକୁ ନେଇ ପ୍ରବଳ ଗଣ୍ଡଗୋଳ ହେବା ସହ ଏହି ଗଣ୍ଡଗୋଳରେ ଜଣେ ଯୁବକଙ୍କ ଆଖି ନଷ୍ଟ ହୋଇଯାଇଥିବା ଜଣାପଡ଼ିଛି । ମିଳିଥିବା ସୂଚନା ଅନୁଯାୟୀ ଆଠଗଡ଼ ଥାନା ଅନ୍ତର୍ଗତ ନୂଆ ଆଙ୍କୁଲା ଗ୍ରାମରେ ଭସାଣି ଯାତ୍ରା ଚାଲିଥିବାବେଳେ ଦୁର୍ବୃତ୍ତଙ୍କ ଆକ୍ରମଣରେ ଜଣେ ବ୍ୟକ୍ତି ଗୁରୁତର ଆହତ ହେବା ସହ ତାଙ୍କର ଗୋଟିଏ ଆଖି ନଷ୍ଟ ହୋଇଯାଇଥିବା ଜଣାପଡ଼ିଛି । ତେବେ ବ୍ୟକ୍ତି ଜଣକ ଆଖି ହରାଇବା ପରେ ମଧ୍ୟ ଦୁବୃର୍ତ୍ତଙ୍କ ଭୟରେ ସମ୍ପର୍କୀୟଙ୍କ ଘରେ ଆଶ୍ରୟ ନେଇଥିବାବେଳେ ପୁଲିସ ପକ୍ଷରୁ ତାଙ୍କୁ କେବେ ନ୍ୟାୟ ମିଳିବ ସେ ନେଇ ଦିନ ଗଣୁଛନ୍ତି ଆଖି ହରାଇଥିବା ଯୁବକ ।
ଅଭିଯୋଗ ଅନୁଯାୟୀ ଗତ ଅକ୍ଟୋବର ମାସ ୪ ତାରିଖ ରାତିର ଘଟଣା, ଭସାଣି ଚାଲିଥିବାବେଳେ ବିଶ୍ୱଜିତ ରାଉତ ନାମକ ଜଣେ ଯୁବକ ଶୁଣିବାକୁ ପାଇଲେ ଯେ, ତାଙ୍କ ଭାଇଙ୍କ ସହ 3 ଦୁବୁର୍ତ୍ତ (ପ୍ରଶାନ୍ତ ସ୍ୱାଇଁ , ମନୋଜ ସ୍ୱାଇଁ ଓ ଲକ୍ଷ୍ମୀଧର ସ୍ୱାଇଁ)ଗଣ୍ଡଗୋଳ କରୁଛନ୍ତି । ତେବେ ଏହି ଖବର ପାଇବା ପରେ ବିଶ୍ୱଜିତ ସେଠାକୁ ଯାଇ ପହଞ୍ଚିବା କ୍ଷଣି ଅଚାନକ ଆକ୍ରମଣର ଶିକାର ହେଲେ । ଦୁବୃର୍ତ୍ତମାନେ ତାଙ୍କୁ ମରଣାନ୍ତକ ଆକ୍ରମଣ କରିଥିଲେ । ତାଙ୍କର ଅବସ୍ଥା ଗୁରୁତର ହୋଇ ପଡ଼ିବାରୁ ପ୍ରଥମେ ଆଠଗଡ଼ ମେଡ଼ିକାଲରେ ଭର୍ତ୍ତି କରାଯାଇଥିଲା । ଅବସ୍ଥା ସଙ୍କଟାପନ୍ନ ହେବାରୁ କଟକ ମେଡ଼ିକାଲକୁ ସ୍ଥାନାନ୍ତର କରାଯାଇଥିଲା । ଚିକିତ୍ସା ପରେ ସାମାନ୍ୟ ସୁସ୍ଥ ହୋଇଥିଲେ ମଧ୍ୟ ତାଙ୍କର ଗୋଟିଏ ଚକ୍ଷୁ ନଷ୍ଟ ହୋଇ ଯାଇଛି ।
ଏନେଇ ଆଠଗଡ଼ ଥାନାରେ ଅଭିଯୋଗ ହୋଇଥିଲେ ମଧ୍ୟ ପୁଲିସର କାର୍ଯ୍ୟାନୁଷ୍ଠାନରେ ମନ୍ଥରତା ଯୋଗୁଁ ଅଭିଯୋଗକାରୀ ପରିବାର ସମ୍ପୂର୍ଣ୍ଣ ଭୟଭୀତ ଅବସ୍ଥାରେ ରହିଥିବା ପ୍ରକାଶ କରିଛନ୍ତି । ଦିନ ପରେ ଦିନ ଗଡ଼ି ଯାଉଥିଲେ ମଧ୍ୟ ପୁଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରିବା ଦ୍ୱାରା ଦୁବୃର୍ତ୍ତମାନେ ପୁଣି କିଛି କ୍ଷତି ଘଟାଇବା ଆଶଙ୍କାରେ ପରିବାର ଲୋକେ ଭୟଭୀତ ରହିଛନ୍ତି । ତେବେ ଏ ନେଇ ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରାଯିବ ବୋଲି ଆଠଗଡ଼ ଏସଡିପିଓ ପ୍ରତିଶ୍ରୁତି ଦେଇଛନ୍ତି ।
