ବରଗଛ କୁ ପିଟିଲା ଗଞ୍ଜେଇ ଭର୍ତ୍ତି ହାଇଓ୍ବା ; ଜବତ ହେଲା ୭ କୁଇଣ୍ଟାଲରୁ ଅଧିକ ଗଞ୍ଜେଇ …
1 min read
ଗଞ୍ଜେଇ ଚୋରା ଚାଲାଣ କରୁଥିବା ଏକ ହାଇଓ୍ବା ଦୁର୍ଘଟଣାଗ୍ରସ୍ତ ହୋଇଛି । ଫଳରେ ରାସ୍ତାରେ ପଡିଛି ପୁଳା ପୁଳା ଗଞ୍ଜେଇ । ସୂଚନା ଅନୁଯାୟୀ ଗତକାଲି ରାତି ପ୍ରାୟ ସାଢ଼େ ୯ଟା ବେଳେ ବୈପାରିଗୁଡା ପଟୁ ଦିଗାପୁର ରାସ୍ତା ଦେଇ ଜୟପୁର ପଟେ ଯାଉଥିବା (ଓଡି ୨୪ ବି ୦୭୮୬) ନମ୍ବର ବିଶିଷ୍ଟ ଏକ ହାଇଓ୍ବା ପୂଜାରୀପୁଟ ଛକ ଠାରେ ରାସ୍ତା କଡ଼ରେ ଥିବା ଗୋଟିଏ ବରଗଛରେ ଧକ୍କା ଖାଇ ଓଲଟି ପଡ଼ିଥିଲା। ଫଳରେ ହାଇଓ୍ବାରେ ଚୋରା ଚାଲାଣ କରାଯାଉଥିବା ଗଞ୍ଜେଇ ପ୍ୟାକେଟ ସବୁ ରାସ୍ତାରେ ବିଛେଇ ହୋଇ ପଡ଼ିଯାଇଥିଲା।
ଦୁର୍ଘଟଣା ଘଟିବା ଦେଖି ପଥଚାରୀ ତୁରନ୍ତ ବୈପାରିଗୁଡା ପୁଲିସକୁ ଖବର ଦେଇଥିଲେ। ପୁଲିସ ଘଟଣାସ୍ଥଳରେ ପହଞ୍ଚି ଗଞ୍ଜେଇ ପ୍ୟାକେଟ ସବୁ ଜବତ କରି ଥାନାକୁ ଆଣିଥିଲା। ମାଜିଷ୍ଟ୍ରେଟଙ୍କ ଉପସ୍ଥିତିରେ ଜବତ ଗଞ୍ଜେଇ ପ୍ୟାକେଟ ସବୁ ଓଜନ କରାଯିବାରୁ ୭ କୁଇଣ୍ଟାଲ ୬୫ କିଲୋ ୩ ଶହ ଗ୍ରାମ ଥିବା ଜଣାପଡ଼ିଥିଲା। ଦୁର୍ଘଟଣା ଘଟିବା ପରେ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଥିବା ଜଣାପଡ଼ିଛି। ବୈପାରିଗୁଡା ଆଇଆଇସି ଦୀପାଞ୍ଜଳି ପ୍ରଧାନ ଗାଡ଼ି ନମ୍ବର ଯାଞ୍ଚ କରିବା ସହ ଚାଲାଣକାରୀକୁ ଖୁବଶୀଘ୍ର ଗିରଫ କରାଯିବ ବୋଲି ପ୍ରକାଶ କରିଛନ୍ତି।
