ଜେଏନ୍ୟୁ କ୍ୟାମ୍ପସ ଗଛରୁ ଝୁଲନ୍ତା ଶବ ଉଦ୍ଧାର: ତଦନ୍ତ କରୁଛି ଦିଲ୍ଲୀ ପୋଲିସ୍
1 min read
ନୂଆଦିଲ୍ଲୀ: ପୁଣି ଥରେ ଚର୍ଚ୍ଚାରେ ଜୱାହାର ଲାଲ ନେହେରୁ ବିଶ୍ୱ ବିଦ୍ୟାଳୟ(ଜେଏନ୍ୟୁ) । ସିଏଏ ବିରୋଧୀ ଆନ୍ଦୋଳନ ହେଉ କି କୌଣସି ଛାତ୍ର ଆନ୍ଦୋଳନ ଅଥବା ଅଫଜଲ ଗୁରୁର ମୃତ୍ୟୁବାର୍ଷିକୀ । ସର୍ବଦା ଚର୍ଚ୍ଚାର ଶୀର୍ଷରେ ରହିଥାଏ ଜେଏନ୍ୟୁ । ତେବେ ବର୍ତ୍ତମାନ ଏକ ମୃତ ଶରୀର ପାଇଁ ଜେଏନ୍ୟୁ ଖବର ଶିରୋନାମାରେ । ଜେଏନ୍ୟୁ କ୍ୟାମ୍ପସ ମଧ୍ୟରୁ ଏକ ଅର୍ଦ୍ଧଗଳିତ ଶବ ଉଦ୍ଧାର କରାଯିବା ସହିତ ଦିଲ୍ଲୀ ପୋଲିସ ପକ୍ଷରୁ ତଦନ୍ତ ଆରମ୍ଭ କରାଯାଇଛି । ଜେଏନ୍ୟୁର କ୍ୟାମ୍ପସ୍ ମଧ୍ୟରେ ରହିଥିବା ଜଙ୍ଗଲ ମଧ୍ୟରୁ ଶୁକ୍ରବାର ଏହି ମୃତଦେହ ଉଦ୍ଧାର କରାଯାଇଛି ।
ଶୁକ୍ରବାର ସନ୍ଧ୍ୟା ୬.୩୦ ସମୟରେ ମୃତଦେହ ନେଇ ପୋଲିସକୁ ଫୋନ୍ କରାଯାଇଥିଲା । ମୃତ ଦେହଟି ଗଳିତ ଅବସ୍ଥାରେ ରହିଥିବା ବେଳେ ବୟସ ୪୦-୪୫ ମଧ୍ୟରେ ରହିବ ବୋଲି କୁହାଯାଉଛି । ଶବଟିର ପରିଚୟ ମିଳିନଥିବା ବେଳେ ପୋଲିସ ପକ୍ଷରୁ ତଦନ୍ତ ଜାରି ରହିଛି । ମୃତ ଦେହଟି କୌଣସି ଛାତ୍ର, ଶିକ୍ଷକ କିମ୍ବା କୌଣସି ବାହାର ଲୋକଙ୍କର ଏହା ତଦନ୍ତ ପରେ ସ୍ପଷ୍ଟ ହେବ । ଫରେନସିକ୍ ଟିମକୁ ଡକାଇ ପୋଲିସ ତଦନ୍ତ ଜାରି ରଖିଛି ।
