(ଭିଡିଓ) ଭୁବନେଶ୍ୱରରୁ ବଲିଉଡ୍ ଯାତ୍ରା : କମାଣ୍ଡୋର ନୂଆ ଆକ୍ସନ ହିରୋ ‘ପ୍ରେମ ପରିଜା’ …
1 min read
ମୁମ୍ବାଇ : ବଲିଉଡ୍ର ନୂଆ କମାଣ୍ଡୋ ଓଡିଆ ପୁଅ ପ୍ରେମ ପରିଜା । ଯାହାଙ୍କୁ ନେଇ ବର୍ତ୍ତମାନ ଚାରିଆଡେ ଚର୍ଚ୍ଚା । ତେବେ କମାଣ୍ଡୋ ଫିଲ୍ମ ନାଁ ଶୁଣିଲେ ସଭିଙ୍କ ମନରେ ବିଦ୍ୟୁତ୍ ଜାମୱାଲ ଙ୍କ କଥା ଆସୁଥିବା । କମାଣ୍ଡୋ , କମାଣ୍ଡୋ-୨ ଏବଂ ୩ ରେ ମଧ୍ୟ ଜବରଦଣ୍ଡ ଆକ୍ସନ,ଷ୍ଟଣ୍ଟରେ ଦର୍ଶକଙ୍କ ମନ କିଣିଥିଲେ ବିଦ୍ୟୁତ୍ । କିନ୍ତୁ ଏଥର ଆପଣମାନେ କମାଣ୍ଡୋରେ ଦେଖିବେ ଆମ ନୂଆ କମାଣ୍ଡୋ ବିରାଟ୍ ( ପ୍ରେମ ପରିଜା) ।
ତେବେ ନିକଟରେ ବଲିଉଡ୍ ଆକ୍ସନ ୱେବ୍ ସିରିଜ୍ କମାଣ୍ଡୋର ପ୍ରଥମ ଟିଜର ସାମ୍ନାକୁ ଆସିଛି । ଯେଉଁଥିରେ ବିଦ୍ୟୁତ୍ଙ୍କୁ ରିପ୍ଲେସ୍ କରିଛନ୍ତି ଓଡିଆ ପୁଅ ପ୍ରେମ ପରିଜା । ତେବେ ଏହି ଓଡିଆ ପୁଅଙ୍କୁ ନେଇ ଏବେ ଚାରିଆଡେ ଚର୍ଚ୍ଚା । ରାଜଧାନୀ ଭୁବନେଶ୍ୱରରୁ ଯାଇ ବଲିଉଡ୍ରେ ପାଦଦେବା ହୁଏତ ଏତେଟା ସହଜ କଥା ନୁହେଁ । ତେବେ ଏହି ଅସମ୍ଭବକୁ ସମ୍ଭବ କରି ଦେଖାଇଛନ୍ତି ଓଡିଆ ପୁଅ ପ୍ରେମ । କମାଣ୍ଡୋ ୱେବସିରିଜରେ ଦମଦାର ଆକ୍ସନ ସହ ମୁଖ୍ୟ ଭୂମିକାରେ ନଜର ଆସିବେ ପ୍ରେମ୍ । ସ୍ୱପ୍ନ ଦେଖିବା ସହଜ, କିନ୍ତୁ ସ୍ୱପ୍ନକୁ ବାସ୍ତବ ରୂପ ଦେବାରେ ବହୁ କଷ୍ଟକୁ ସାମ୍ନା କରିବାକୁ ପଡେ । ଏଥିପାଇଁ ଖୁବ୍ କମ୍ ଲୋକ ସାହସ କରନ୍ତି । ସେହିଭଳି ଜଣେ ଯୁବ ପ୍ରତିଭା ହେଉଛନ୍ତି ଆମ ଓଡିଆ ପୁଅ ପ୍ରେମ୍ ପରିଜା । ଭୁବନେଶ୍ୱରରେ ଜନ୍ମ ହୋଇଥିବା ପ୍ରେମ୍ ଖୁବ୍ କମ୍ ବୟସରୁ ବଲିଉଡରେ ପାଦ ଥାପିବାର ସ୍ୱପ୍ନ ଦେଖିଥିଲେ । ଭୁବନେଶ୍ୱରର ସେଂଟ ଜୋସେଫ୍ ସ୍କୁଲରେ ଅଧ୍ୟୟନ ପରେ ଉଚ୍ଚଶିକ୍ଷା ପାଇଁ ଦିଲ୍ଲୀ ବିଶ୍ୱବିଦ୍ୟାଳୟକୁ ଯାଇଥିଲେ ପ୍ରେମ୍ ।
ଭୁବନେଶ୍ୱରରେ ଥିଏଟିରରେ ଅଭିନୟ କରିବା ପରେ ଦିଲ୍ଲୀ ଯାଇ ହନ୍ସରାଜ କଲେଜର ଡ୍ରାମାଟିକ୍ ସୋସାଇଟି ତରଫରୁ ଦେଶର ବିଭିନ୍ନ ସ୍ଥାନରେ ଆୟୋଜିତ ନାଟକରେ ଅଭିନୟ କରିଥିଲେ ।ଏହା ପରେ ସେ ବଲିଉଡରେ ପ୍ରବେଶ କଲେ । କ୍ୟାରିୟର ଆରମ୍ଭରୁ ବଲିଉଡରେ ଜଣେ ସହ ନିର୍ଦ୍ଦେଶକ ଭାବେ କାମ କଲେ । ୨୦୧୩ରୁ ୨୦୨୧ ଭିତରେ ‘ୱେଲକମ୍ ଟୁ କରାଚି’, ‘ସତ୍ୟମେବ ଜୟତେ’, ‘ବାଜାର’, ନେଟଫ୍ଲିକ୍ସର ହଲିଉଡ୍ ଧାରାବାହିକ ‘ସେନ୍ସ ୮’, ଏବଂ ‘ବାଟଲା ହାଉସ’ରେ ପରଦା ପଛରେ କାମ କରିଛନ୍ତି ପ୍ରେମ୍ ପରିଜା । ଏବେ କମାଣ୍ଡୋ ୱେବସିରିଜରେ ଲିଡ୍ ରୋଲରେ ନଜର ଆସିବାକୁ ଯାଉଛନ୍ତି । ଏହାର ଟିଜର ଏବେ ରିଲିଜ୍ ହୋଇଛି । ଯେଉଁଥିରେ ପ୍ରେମଙ୍କର ଜବରଦସ୍ତ ଆକ୍ସନ ଦେଖିବାକୁ ମିଳିଛି । ଏହି ୱେବସିରିଜଟି ଓଟିଟି ପ୍ଲାଟଫର୍ମ ଡିଜନି ପ୍ଲସ ହଟଷ୍ଟାରରେ ରିଲିଜ୍ ହେବ । ତେବେ ପ୍ରେମଙ୍କ ସହ ଅଦା ଶର୍ମା, ଅମିତ ସିଆଲ୍, ମୁକେଶ ଛାବ୍ରା ଏବଂ ତିଗମାନସୁ ଧୁଲିଆଙ୍କୁ ଅନ୍ୟାନ୍ନ ପ୍ରମୁଖ ଭୂମିକାରେ ଦେଖିବାକୁ ମିଳିବ ।
