ଘରକୁ ଫେରୁଥିବା ବେଳେ ନଦୀର ପ୍ରଖର ସ୍ରୋତରେ ଭାସିଗଲେ ମହିଳା…
1 min read
ଗଜପତି: କାମ ସାରି ଫେରୁଥିବା ବେଳେ ବାଟରେ ଛକି ବସିଥିଲା ମୃତ୍ୟୁ । ବଗଡ କାମ ସାରି ଘରକୁ ଫେରିଲା ବେଳେ ନଦୀର ପ୍ରଖର ସ୍ରୋତରେ ଭାସିଗଲେ ମହିଳା । ସ୍ୱାମୀଙ୍କ ମୃତ୍ୟୁ ପରେ ପିଲାମାନଙ୍କ ପାଇଁ ସାହା ଭରସା ଥିଲେ ମହିଳା । କାମ କରି ପରିବାରର ଗୁଜୁରାଣ ମେଣ୍ଟାଉଥିଲେ । ହେଲେ ଏବେ ମହିଳାଙ୍କର ମୃତ୍ୟୁ ପରେ ଅନାଥ ହୋଇଗଲେ ପିଲା ମାନେ । ଆଗରୁ ବାପା ଚାଲିଯାଇଥିଲେ ଆଉ ଏବେ ମା’ଙ୍କ ମୃତ୍ୟୁରେ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି ପିଲାମାନେ । ହଁ ଆଜ୍ଞା ଏପରି ଦୁଃଖଦ ଘଟଣା ଘଟିଯାଇଛିଗଜପତି ଜିଲ୍ଲା ଅଡବା ଥାନା ଅନ୍ତର୍ଗତ ପାଣିଗଣ୍ଡା ଗ୍ରାମ ପଞ୍ଚାୟତ ଶିଙ୍କୁଳିଢିଅ ଗାଁରେ । ଆଉ ମୃତ ମହିଳା ଜଣଙ୍କ ହେଉଛନ୍ତି ସେହି ଗାଁର ସେରନି ଭୂୟାଁ ।
ସୂଚନା ମୁତାବକ ସେରନୀ ଗାଁର ଅନ୍ୟ ଦୁଇଜଣ ମହିଳାଙ୍କ ସହ ବଗଡ଼ କାମ କରିବାକୁ ପାହାଡକୁ ଯାଇଥିଲେ । ଗତକାଲି ସନ୍ଧ୍ୟା ସମୟ ପ୍ରାୟ ୫.୩୦ରେ ନଦୀ ପାର ହୋଇ ନିଜ ଗ୍ରାମ ଶିଙ୍କୁଳିଢିଅ ଫେରୁଥିଲେ । ନନ୍ଦିଂ ନଦୀର ଉପର ମୁଣ୍ଡରେ ବର୍ଷା ଯୋଗୁ ନଦୀ ପାଣି ବଡିଯାଇଥିଲା । ଆଉ ନଦି ପାର ହେଉଥିବା ବେଳେ ପ୍ରଖର ସ୍ରୋତ ଯୋଗୁଁ ଭାସିଯାଇଥିଲେ ସେରନୀ । ଖବର ପାଇ ଆଜି ସକାଳେ ଦମକଳ ବାହିନୀ ଘଟଣା ସ୍ଥଳରେ ପହଞ୍ଚି ଖୋଜା ଖୋଜି କରିବା ପରେ ସେଠାରୁ ୨୦୦ ମିଟର ଦୂରରୁ ସେରନିଙ୍କ ମୃତ ଦେହ ଉଦ୍ଧାର କରିଥିଲେ । ସେରନି ଙ୍କ ସ୍ୱାମୀ ଦୀର୍ଘ ବର୍ଷ ହେବ ଆରପାରିକୁ ଚାଲିଯାଇଥିବା ବେଳେ ଏବେ ୫ ଜଣ ପୁଅ ଝିଅ ଅନାଥ ହୋଇଗଲେ । ମୃତ ସେରନିଙ୍କ ଦୁଇ ପୁଅ ତିନି ଝିଅ ଥିବା ବେଳେ ବଡ଼ ଝିଅ ବିବାହ କରିସାରିଛନ୍ତି । ତେବେ ସମସ୍ତ ପିଲାଛୁଆ ବେସାହାରା ହୋଇଯାଇଛନ୍ତି ।ଏଣୁ ଗ୍ରାମ ବାସୀ ସରକାରଙ୍କୁ ନିବେଦନ କରିଛନ୍ତି କିପରି ସରକାରୀ ସହାୟତା ମିଳିଥଲେ ପିଲାଙ୍କ ଭବିଷ୍ୟତ ଉଜ୍ୱଳ ହୋଇପାରିବ ।
