ମଧ୍ୟପ୍ରଦେଶ ସଚିବାଳୟରେ ଭୟାବହ ଅଗ୍ନିକାଣ୍ଡ…..ଆକାଶରେ ଛାଇ ଗଲା କଳା ବାଦଲ

ମଧ୍ୟପ୍ରଦେଶର ରାଜଧାନୀ ଭୋପାଲ ସଚିବାଳୟରେ ଭୟାବହ ଅଗ୍ନିକାଣ୍ଡ | ତୃତୀୟ ମହଲାରେ ଲାଗିଛି ନିଆଁ | ଆଜି ସକାଳେ ସଚିବାଳୟ ଭବନରେ ବହୁ ଧୂଆଁ ବାହାରିବାର ଦେଖିବାକୁ ମିଳିଥିଲା | ଧୂଆଁରୁ ବିଚାର ହେଉଥିଲା ଯେ ନିଆଁ ଭୟଙ୍କର ଲାଗିଥିଲା | ଅଗ୍ନିଶ୍ରମ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବା ପାଇଁ ଚେଷ୍ଟା କରିଥିଲା | ବର୍ତ୍ତମାନ ନିଆଁ ଆୟତ୍ତକୁ ନେଇ ସୂଚନା ଦେଇଥିଲେ ମୁଖ୍ୟମନ୍ତ୍ରୀ ମୋହନ ଯାଦବ |

ସୂଚନା ମୁତାବକ, ଭୋପାଳର ବଲ୍ଲଭ ଭବନରେ ରହିଛି ସଚିବାଳୟ | ହଠାତ ସକାଳେ ତୃତୀୟ ମହଲାରେ ନିଆଁ ଲାଗିଯାଇଥିଲା | ଏହି ଘଟଣା ହେବା କ୍ଷଣି ବିଲ୍ଡିଂରେ ଥିବା ସମସ୍ତ ଲୋକ ପ୍ରାଣ ବିକଳେ ନିଜ ଜୀବନ ବଞ୍ଚାଇବା ପାଇଁ ବାହାରକୁ ଚାଲିଆସିଥିଲେ | ସୂଚନା ପାଇ ଅଗ୍ନିଶ୍ରମ ବାହିନୀ ପହଞ୍ଚି ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲା | ପ୍ରାୟ ୧ ଘଣ୍ଟାରୁ ଉର୍ଦ୍ଧ୍ବ ସମୟ ପରେ ନିଆଁ ଆୟତ୍ତକୁ ଆସିଥିଲା |

ଘଟଣା ଦ୍ୱାରା କେହି ମୃତାହତ ହୋଇନଥିବାର ସୂଚନା ମିଳିଛି | କିନ୍ତୁ ବହୁ ଗୁରୁତ୍ୱପୂର୍ଣ କାଗଜ ଜଳିପୋଡ଼ିଯାଇଥିବାର ଜଣାଯାଇଛି | ଏବେ ପର୍ଯ୍ୟନ୍ତ ଏହି ଭୟାବହ ଅଗ୍ନିକାଣ୍ଡର କାରଣ ଜଣାପଡିନାହିଁ |