ସୁନିତା କେଜ୍ରିୱାଲଙ୍କୁ ଭେଟିଲେ କଳ୍ପନା ସୋରେନ , ଜଣେ ଜଣଙ୍କୁ ଦେଲେ ଆଶ୍ୱସନା ..

ଜେଲ୍ ଭିତରେ ରହିଛନ୍ତି ସ୍ୱାମୀମାନେ । ବାହାରେ ଦୁଇ ସ୍ତ୍ରୀ ପରସ୍ପରକୁ ଭେଟି ଜଣେ ଆଉଜଣଙ୍କର ସାହାରା ପାଲଟିଛନ୍ତି । ଅରବିନ୍ଦ କେଜ୍ରିୱାଲଙ୍କ ପତ୍ନୀ ସୁନୀତା କେଜ୍ରିୱାଲଙ୍କୁ ଭେଟିଲେ ହିମନ୍ତ ସୋରେନଙ୍କ ପତ୍ନୀ କଳ୍ପନା ସୋରେନ । ଦୁହେଁ ଦୁହିଁଙ୍କୁ ଭେଟି ପରସ୍ପରକୁ ଆଶ୍ୱସନା ଦେଇଛନ୍ତି । ଦୁହିଁଙ୍କ ସ୍ୱାମୀ ଏବେ ଇଡି ହେପାଜତରେ ରହିଛନ୍ତି । ଅରବିନ୍ଦ କେଜ୍ରିୱାଲ ମଦ ଦୁର୍ନିତୀ ମାମଲାରେ ଗିରଫ ହୋଇଥିବା ବେଳେ ହିମନ୍ତ ସୋରେନ ଜମି ଦୁର୍ନିତୀ ମାମଲାରେ ଗିରଫ ହୋଇ ଜେଲ୍ ରେ ରହିଛନ୍ତି । ତେବେ କଳ୍ପନାଙ୍କ ସହିତ ଆପ୍ ନେତା ସୌରଭ ଭରଦ୍ୱାଜ ମଧ୍ୟ ରହିଛନ୍ତି ।

ସୁନୀତା ଏବଂ କଳ୍ପନାଙ୍କ ସାକ୍ଷାତ ସମୟର ଏକ ଭିଡିଓ ଏବେ ସାମ୍ନାକୁ ଆସିଛି । ଏହି ଭିଡିଓରେ ଉଭୟ ପରସ୍ପରକୁ ଆଲିଙ୍ଗନ କରୁଥିବା ଦେଖିବାକୁ ମିଳିଛି । ଏହି ଭିଡିଓ ଦେଖି ଲାଗୁଛି ଉଭୟ ନିଜ ନିଜ ସ୍ୱାମୀଙ୍କ ପାଇଁ ସମାନ ଦୁଃଖରେ ରହିଥିବା ବେଳେ ନିଜ ନିଜର ସ୍ୱାମୀଙ୍କ ପାଇଁ ଲଢେଇ ଜାରୀ ରଖିବେ । ଅରବିନ୍ଦ କେଜ୍ରିୱାଲ ଗିରଫ ହେବା ଖବର ଶୁଣିବା ପରେ ମଧ୍ୟ କଳ୍ପନା ସୁନୀତା କେଜ୍ରିୱାଲଙ୍କ ସହ ଫୋନରେ କଥା ହୋଇଥିଲେ । ସେହି ସମୟ ମଧ୍ୟରେ ସେ କହିଥିଲେ ଯେ ଜଣେ ବନ୍ଧୁ ଭାବରେ ମୁଁ ତାଙ୍କ ସମସ୍ୟା ବୁଝିପାରୁଛି । ସୁଚନାଯୋଗ୍ୟ ଯେ ମାର୍ଚ୍ଚ ୩୧ ରେ ଦିଲ୍ଲୀର ରାମଲୀଲା ମୈଦାନରେ ଅରବିନ୍ଦ କେଜ୍ରିୱାଲଙ୍କ ଗିରଫଦାରୀ ବିରୋଧରେ ଇଣ୍ଡିଆ ମେଣ୍ଟ ତରଫରୁ ଏକ ରାଲି ରହିଛି । ଏହି ରାଲି କୌଣସି ବ୍ୟକ୍ତି ନୁହେଁ ବରଂ ସମ୍ବିଧାନକୁ ବଞ୍ଚାଇବାକୁ କରାଯାଇଛି । ଏହି ରାଲିରେ ଭାଗ ନେବାକୁ କଳ୍ପନା ସୋରେନ ଝାଡଖଣ୍ଡରୁ ଦିଲ୍ଲୀରେ ପହଞ୍ଚିଛନ୍ତି । ଏବଂ ସେ ସୁନୀତା କେଜ୍ରିୱାଲଙ୍କୁ ସାକ୍ଷାତ କରିଛନ୍ତି ।