ଡେରା ମ୍ୟାନେଜର ହତ୍ୟା ମାମଲାରେ ରାମ ରହିମ ହେଲେ ଦୋଷ ମୁକ୍ତ..
ଆତ୍ମଘୋଷିତ ବାବା ରାମ ରହିମଙ୍କୁ କୋର୍ଟ ରୁ ମିଳିଲା ଆଶ୍ୱସ୍ତି। ହତ୍ୟା ମାମଲାରେ ହେଲେ ଦୋଷମୁକ୍ତ । ପଞ୍ଜାବ ଏବଂ ହରିୟାଣା ହାଇକୋର୍ଟ ରଣଜିତ ସିଂ ହତ୍ୟା ମାମଲାରେ ଡେରା ସଚ୍ଚା ସୌଦା ମୁଖ୍ୟ ଗୁରୁମିତ ରାମ ରହିମଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି। ଏହି ମାମଲାରେ ସ୍ବତନ୍ତ୍ର ସିବିଆଇ କୋର୍ଟ ଦେଇଥିବା ରାୟକୁ ରଦ୍ଦ କରି ରାମ ରହିମ ଏବଂ ଅନ୍ୟ ଚାରିଜଣଙ୍କୁ ନିର୍ଦ୍ଦୋଷରେ ଖଲାସ କରାଯାଇଛି। ପଞ୍ଚକୁଲାର ସ୍ବତନ୍ତ୍ର କୋର୍ଟ ପୂର୍ବରୁ ଏହି ମାମଲାରେ ଦଣ୍ଡ ଘୋଷଣା କରିଥିଲେ ଯାହା ପରେ ହାଇକୋର୍ଟରେ ଚ୍ୟାଲେଞ୍ଜ କରାଯାଇଥିଲା।
ପଞ୍ଚକୁଲାର ସ୍ବତନ୍ତ୍ର କୋର୍ଟ ରଣଜିତ ସିଂ ହତ୍ୟା ମାମଲାରେ ଡେରା ସଚ୍ଚା ସୌଦା ମୁଖ୍ୟ ଗୁରୁମିତ ରାମ ରହିମଙ୍କ ସମେତ ପାଞ୍ଚଜଣ ଦୋଷୀଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ। ଏଥିସହ ଗୁରୁମିତ ରାମ ରହିମଙ୍କ ଉପରେ ୩୧ଲକ୍ଷ ଟଙ୍କା ଜୋରିମାନା ମଧ୍ୟ ଲାଗୁ କରାଯାଇଛି। ସମସ୍ତ ଦୋଷୀଙ୍କୁ ବିଭିନ୍ନ ବିଭାଗ ଅଧୀନରେ ଦଣ୍ଡିତ କରାଯାଇଛି। ଗୁରୁମିତ ରାମ ରହିମଙ୍କ ପାଇଁ ସିବିଆଇ ମୃତ୍ୟୁଦଣ୍ଡ ଦାବି କରିଥିଲା, କିନ୍ତୁ କୋର୍ଟ ତାଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ। ଅନ୍ୟପକ୍ଷରେ ଗୁରୁମିତ ରାମ ରହିମଙ୍କ ଓକିଲ ଅଜୟ ବର୍ମନ କହିଛନ୍ତି ଯେ ସେ ଏହି ନିଷ୍ପତ୍ତିକୁ ପଞ୍ଜାବ ଏବଂ ହରିୟାଣା ହାଇକୋର୍ଟରେ ଚ୍ୟାଲେଞ୍ଜ କରିବେ। ଏହା ପରେ ସେ ପଞ୍ଜାବ ଏବଂ ହରିୟାଣା ହାଇକୋର୍ଟରେ ଚ୍ୟାଲେଞ୍ଜ କରିଥିଲେ ଯେଉଁଥିରେ ରାମ ରହିମ ଏବଂ ଅନ୍ୟ ଚାରିଜଣ ବ୍ୟକ୍ତି ନିର୍ଦ୍ଦୋଷରେ ଖଲାସ ହୋଇଛନ୍ତି।
