ବିଜେଡିର ସ୍ପଷ୍ଟୋକ୍ତି; ନବୀନ ଙ୍କ ନିର୍ଦ୍ଦେଶରେ ଦିଲ୍ଲୀ ଯାଇଛନ୍ତି ପାଣ୍ଡିଆନ ..

ବିଜେଡ଼ି ର ପରାଜୟ ପରେ ସାମ୍ନାକୁ ଆସିନାହାନ୍ତି ଭିକେ ପାଣ୍ଡିଆନ । ଯାହାପରେ ଅନେକ ଲୋକ ଅନେକ ପ୍ରକାରର କଥା କହିବାରେ ଲାଗିଛନ୍ତି। ଏବଂ ତାଙ୍କର ଦିଲ୍ଲୀ ଗସ୍ତକଥା ମଧ୍ୟ ସାମ୍ନାକୁ ଆସିଥିଲା । ଏପରି ଚର୍ଚ୍ଚା ପରେ ଶେଷରେ ପ୍ରତିକ୍ରିୟା ରଖିଛି ବିଜେଡି। ଗୁରୁବାର ଦିନ ବିଜେଡି ସାଂସଦ ସସ୍ମିତ ପାତ୍ର ପାଣ୍ଡିଆନଙ୍କ ଦିଲ୍ଲୀ ଗସ୍ତ ନେଇ ସ୍ପଷ୍ଟୋକ୍ତି ରଖିଛନ୍ତି।

ସସ୍ମିତ କହିଛନ୍ତି ଯେ ବିଜୁ ଜନତା ଦଳର ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ କୌଣସି କାର୍ଯ୍ୟବଶତଃ ବିଜେଡି ନେତା କାର୍ତ୍ତିକ ପାଣ୍ଡିଆନ ଦିଲ୍ଲୀ ଗସ୍ତରେ ଅଛନ୍ତି । ହେଲେ କେତେକ ନିର୍ଦ୍ଦିଷ୍ଟ ଗଣମାଧ୍ୟମ ତାଙ୍କ ଦିଲ୍ଲୀ ଗସ୍ତକୁ ନେଇ ଅତ୍ୟନ୍ତ ଅରୁଚିକର, ତଥ୍ୟ ବିହୀନ, ମନ୍ଦ ଉଦ୍ଦେଶ୍ୟ ପ୍ରଣୋଦିତ ଓ ବିଭ୍ରାନ୍ତିକର ଖବର ପ୍ରସାରଣ କରୁଛନ୍ତି । ଏପରି ଅରୁଚିକର ଓ ମନ୍ଦ ଉଦ୍ଦେଶ୍ୟ ପ୍ରଣୋଦିତ ଖବର ପ୍ରସାରଣରୁ କ୍ଷାନ୍ତ ରହିବାକୁ ସମ୍ପୃକ୍ତ ଗଣମାଧ୍ୟମକୁ ବିଜେଡି ଅନୁରୋଧ କରିଛି। ବିଜେଡି ରାଜ୍ଯସଭା ସାଂସଦ ସସ୍ମିତ ପାତ୍ର ଆହୁରି ମଧ୍ୟ କହିଛନ୍ତି,ଯେ ‘କୌଣସି ଦଳର ନେତା ବା ନେତୃବୃନ୍ଦ କୌଣସି ସ୍ଥାନକୁ ଗସ୍ତ କଲେ ଗଣମାଧ୍ୟମକୁ ସୂଚନା ଦେଇ ଯିବାର କୌଣସି ପ୍ରାବଧାନ ବା ନିୟମ ନାହିଁ । ତେଣୁ ଦୟାକରି ସମ୍ପୃକ୍ତ ଗଣମାଧ୍ୟମ ଏପରି ଖବର ପ୍ରସାରଣରୁ ବିରତ ରହିବାକୁ ପୁନଃ ଅନୁରୋଧ କରୁଛୁ ।’