ଅଜଗର ପେଟରୁ ମିଳିଲା ୩ ଦିନ ଧରି ନିଖୋଜ ଥିବା ମହିଳା

1 min read

6 months ago Niyati Das

ଇଣ୍ଡୋନେସିଆରେ ଏକ ଘଟଣା ସାମ୍ନାକୁ ଆସିଛି ଯାହା ସମଗ୍ର ଅଞ୍ଚଳକୁ ଥରାଇ ଦେଇଛି। ଏକ ୧୬ ଫୁଟ ଲମ୍ବ ଅଜଗର ପେଟରୁ ଉଦ୍ଧାର ହୋଇଛି ଜଣେ ମହିଳାଙ୍କ ମୃତଦେହ | ତେବେ ଆଶ୍ଚର୍ଯ୍ୟକର କଥା ହେଉଛି ୩ ଦିନ ଧରି ନିଖୋଜ ରହିବା ପରେ ମହିଳାଙ୍କ ମୃତଦେହ ଏକ ଅଜଗର ପେଟରୁ ବାହାରିଛି। ଏପରି ଚକିତ ଘଟଣାଟି ଇଣ୍ଡୋନେସିଆର ଦକ୍ଷିଣ ସୁଲାୱେସି ପ୍ରଦେଶ ଅନ୍ତର୍ଗତ କାଲେମପାଙ୍ଗ ଗ୍ରାମର।

ସୂଚନା ଅନୁସାରେ, ୪୫ ବର୍ଷୀୟ ଫରିଦା ୩ ଦିନ ହେବ ହଠାତ ନିଖୋଜ ହୋଇ ଯାଇଥିଲେ। ସେ କୌଣସି କାମରେ ଘରୁ ଯିବା ପରେ ଆଉ ଫେରିନଥିଲେ। ଫଳରେ ଫରିଦାଙ୍କ ସ୍ୱାମୀ ଓ ପଡ଼ୋଶୀ ମିଶି ଆଖ ପାଖ ଅଞ୍ଚଳରେ ଖୋଜାଖୋଜି କରିବା ସହ ପୁଲିସକୁ ମଧ୍ୟ ଖବର ଦେଇଥିଲେ।

୨ ଦିନ ଖୋଜିବା ପରେ ୩ୟ ଦିନ ବେଳକୁ ପଡୋଶୀ ଘର ନିକଟରେ ଏକ ବିରାଟକାୟ ଅଜଗର ସୋଇଥିଲା, ଯାହାର ପେଟ ବହୁତ ଫୁଲିଥିଲା | ଯାହାକୁ ଦେଖି ସ୍ଥାନୀୟ ଲୋକଙ୍କ ସନ୍ଦେହ ହୋଇଥିଲା | ପରେ ସ୍ଥାନୀୟ ପ୍ରଶାସନ ପକ୍ଷରୁ ଅନୁମତି ମିଳିବା କ୍ରମେ ଅଜଗର ପେଟ କଟାଯାଇ ମହିଳାଙ୍କ ମୃତଡିଦେହ ଉଦ୍ଧାର କରାଯାଇଥିଲା |