ପୁଣି ଅଡୁଆରେ ଷ୍ଟାର ଦମ୍ପତ୍ତି : ଡ୍ରଗ୍ସ ମାମଲାକୁ ନେଇ ଚାର୍ଜସିଟ୍ ଦାଖଲ କଲା NCB
1 min read
ନୂଆଦିଲ୍ଲୀ : ଏହି ଦୁଇ ଷ୍ଟାର ଦମ୍ପତ୍ତିଙ୍କୁ କିଏବା ନଜାଣେ । ଜଣେ କମେଡି କୁଇନ ହେଲେ ଅନ୍ୟ ଜଣେ କମେଡି କିଙ୍ଗ୍ ସହ ପ୍ରଡୁସର ଓ ସ୍କ୍ରିନରାଇଟର । କିନ୍ତୁ ବର୍ତ୍ତମାନ ଏହି ଦୁଇ ଷ୍ଟାର ଦମ୍ପତ୍ତିଙ୍କ ପାଇଁ ଚିନ୍ତାରେ ପ୍ରଶଂସକ । ୨୦୨୦ରେ ଘଟିଥିବା ଡ୍ରଗ୍ସ ମାମଲାରେ ଭାରତୀ ଓ ହର୍ଷଙ୍କ ଉପରେ ପୁଣି ଥରେ ଆକ୍ସନ ନେଇପାରେ ଏନସିବି । ଅକ୍ଟୋବର ୨୯ ଅର୍ଥାତ୍ ଆଜି ଏହି ଦମ୍ପତ୍ତିଙ୍କ ବିରୋଧରେ କୋର୍ଟରେ ଚାର୍ଜସିଟ୍ ଦାଖଲ କରିଛି ଏନ୍ସିବି । ଏକ ବିଶେଷ ସୂତ୍ରରୁ ଜଣାପଡିଛି ଯେ ମୁମ୍ବାଇ ଏନ୍ସିବି ଏହି ଡ୍ରଗ୍ସ ମାମଲାରେ ପ୍ରାୟ ୨୦୦ ପୃଷ୍ଠାର ଚାର୍ଜସିଟ୍ ଦାଖଲ କରିଛି ।
୨୦୨୦ ରେ ଲୋକପ୍ରିୟ ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା ପରେ ବଲିଓଡ୍ରେ ଡ୍ରଗ୍ସ ଲିଙ୍କ୍ ଥିବା ନେଇ ତଦନ୍ତ ଆରମ୍ଭ କରିଦେଇଥିଲା ଏନସିବି । ଆଳୁ ଖୋଳୁ ଖୋଳୁ ମହାଦେବ ବାହାରିଲା ଭଳି ଇଣ୍ଡଷ୍ଟ୍ରିରୁ ବଡ ବଡ ସେଲିବ୍ରେଟିଙ୍କ ନାଁ ସାମ୍ନାକୁ ଆସିଥିଲା । ସେଥିମଧ୍ୟରୁ କମେଡି କୁଇନ ଭାରତୀ ସିଂ ଜଣେ ।
ଏହାପରେ ଏନସିବି ଭାରତୀ ଓ ହର୍ଷଙ୍କ ଘରେ ଚଢାଉ କରିଥିଲା । ଚଢାଉ ବେଳେ ତାଙ୍କ ଘରୁ ଗଞ୍ଜେଇ ମଧ୍ୟ ଜବତ କରିଥିଲା ଏନସିବି । ଏନେଇ ଉଭୟଙ୍କୁ ପଚରାଉଚରା କଲା ବେଳେ ଦୁହେଁ ଗଞ୍ଜେଇ ସେବନ କରୁଥିବା ନେଇ ସତ ମାନିଯାଇଥିଲେ । ଏହାପରେ ଉଭୟଙ୍କୁ ଏନ୍ଡିପିସି ଆକ୍ଟ ୧୯୮୬ ଆଧାରରେ ଗିରଫ କରାଯାଇଥିଲା। କିନ୍ତୁ ବର୍ତ୍ତମାନ ଦୁହେଁ ଜାମିନରେ ଥିବାବେଳେ , ପୁଣି ଅଡୁଆରେ ପସିପାରନ୍ତି ବୋଲି ଆଶଙ୍କା କରାଯାଉଛି ।
