ସଲମାନଙ୍କୁ ମାରିବାକୁ ଦେଇଥିଲେ ୨୫ ଲକ୍ଷ ଟଙ୍କାର ସୁପାରୀ , ଆସିଥିଲା ପାକିସ୍ତାନରୁ ଏକେ ୪୭..
1 min read
ବଲିଉଡ୍ ସୁପରଷ୍ଟାର ସଲମାନ ଖାନଙ୍କୁ ହତ୍ୟା କରିବା ପାଇଁ ସୁପାରୀ କିଲରଙ୍କୁ ଦିଆଯାଇଥିଲା ୨୫ ଲକ୍ଷ ଟଙ୍କାର ସୁପାରୀ । ସଲମାନଙ୍କ ଫାର୍ମ ହାଉସରେ ତାଙ୍କୁ ହତ୍ୟା କରିବାର ଯୋଜନା କରାଯାଇଥିଲା। ମୁମ୍ବାଇ ପୋଲିସ ପକ୍ଷରୁ ଦାଖଲ ହୋଇଥିବା ଚାର୍ଜସିଟରେ ହୋଇଛି ବଡ଼ ଖୁଲାସା ।
ପାଞ୍ଚ ଜଣଙ୍କ ନାମରେ ପୋଲିସ ଦାଖଲ କରିଥିବା ଚାର୍ଜସିଟରେ କହିଛି ଯେ ଜେଲରେ ଥିବା ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇ ନେତୃତ୍ୱରେ ଏହି ସୁପାରୀ ନିଆଯାଇଛି। ଅଭିଯୁକ୍ତମାନେ ପାକିସ୍ତାନରୁ ଅତ୍ୟାଧୁନିକ ଅସ୍ତ୍ର ଏ.କେ ୪୭, ଏ.କେ ୯୨ ଏବଂ ଏମ୍ ୧୬ ଏବଂ ତୁର୍କୀରେ ନିର୍ମିତ ଜିଗାନା ଅସ୍ତ୍ର କିଣିବାକୁ ପ୍ରସ୍ତୁତ ହେଉଥିଲେ ଯେଉଁଥିରେ ପଞ୍ଜାବୀ ଗାୟକ ସିଦ୍ଧୁ ମୋସେୱାଲାଙ୍କୁ ହତ୍ୟା କରାଯାଇଥିଲା। ଅଭିଯୁକ୍ତ ସଲମାନ ଖାନଙ୍କୁ ହତ୍ୟା କରିବା ପାଇଁ ୧୮ ବର୍ଷରୁ କମ୍ ନାବାଳକଙ୍କ କଣ୍ଟ୍ରାକ୍ଟ ଦେଇଥିଲା। ଏମାନେ ସମସ୍ତେ ପୁଣେ, ରାୟଗଡ, ନଭି ମୁମ୍ବାଇ, ଥାନେ ଏବଂ ଗୁଜୁରାଟରେ ଲୁଚି ରହିଥିଲେ।
ଏଥିସହିତ ୬୦ ରୁ ୭୦ ଜଣ ସଲମାନଙ୍କ ଗତିବିଧିକୁ ଟ୍ରାକ୍ କରୁଥିଲେ, ବିଶେଷ କରି ବାନ୍ଦ୍ରା ଘର, ପାନଭେଲା ଫାର୍ମ ହାଉସ ଏବଂ ଗୋରେଗାଓଁ ଫିଲ୍ମ ସିଟି ଉପରେ ନଜର ରଖାଯାଇଥିଲା। ଏହାପରେ ସଲମାନଙ୍କୁ ହତ୍ୟା କରିବାକୁ ଅଗଷ୍ଟ ୨୦୨୩ ଏବଂ ଏପ୍ରିଲ ୨୦୨୪ ମଧ୍ୟରେ କରିବାକୁ ଯୋଜନା କରାଯାଇଥିବା ଚାର୍ଜସିଟରେ ଉଲ୍ଲେଖ ରହିଛି।
ଅନୁସନ୍ଧାନରୁ ଜଣାପଡିଛି ଯେ ଗୁରୁବାର ଦିନ ହରିୟାଣାର ପାନିପତରୁ ଗିରଫ ହୋଇଥିବା ସୁଖା ଏହି ଷଡଯନ୍ତ୍ରରେ ସମ୍ପୃକ୍ତ ସୁଟର ଅଜୟ କାଶ୍ୟପ ଛଦ୍ମନାମ ଏ.କେ ଏବଂ ଅନ୍ୟ ଚାରିଜଣଙ୍କୁ ଏହି କଣ୍ଟ୍ରାକ୍ଟ ଦେଇଥିଲେ। ତେବେ ହତ୍ୟା ଯୋଜନା ସମୟରେ ସେମାନେ ଅନୁଭବ କରିଥିଲେ ଯେ, ସଲମାନଙ୍କ କଡା ସୁରକ୍ଷା ଏବଂ ବୁଲେଟ୍ ପ୍ରୁଫ୍ ଗାଡି ଯୋଗୁଁ ଏହି ହତ୍ୟାକାଣ୍ଡ ପାଇଁ ହାଇଟେକ୍ ଅସ୍ତ୍ରଶସ୍ତ୍ର ଆବଶ୍ୟକ ହେବ।
ସେଥିପାଇଁ ସେମାନେ ପାକିସ୍ତାନ ଭିତ୍ତିକ ଅସ୍ତ୍ର ବିକ୍ରେତା ଡୋଗରଙ୍କ ସହ ଯୋଗାଯୋଗ କରି ଏ.କେ ୪୭ ଏବଂ ଅନ୍ୟାନ୍ୟ ହାଇଟେକ୍ ଅସ୍ତ୍ରଶସ୍ତ୍ର ଆଣିବାକୁ ଅର୍ଡର ଦେଇଥିଲେ। ଡୋଗର ଅସ୍ତ୍ରଶସ୍ତ୍ର ଯୋଗାଇବାକୁ ରାଜି ହୋଇଥିବାବେଳେ ସୁଖା ୫୦ ପ୍ରତିଶତ ଆଡ଼ଭାନ୍ସ ପେମେଣ୍ଟ ଏବଂ ଅବଶିଷ୍ଟ ଟଙ୍କା ଭାରତରେ ଦେବାକୁ କରିବାକୁ ରାଜି ହୋଇଥିଲେ।
ପୋଲିସ ଏହା ମଧ୍ୟ ଜାଣିବାକୁ ପାଇଛି ଯେ ସମସ୍ତ ସୁଟର କାନାଡା ଭିତ୍ତିକ ଗ୍ୟାଙ୍ଗଷ୍ଟର ଗୋଲ୍ଡି ବରାର ଏବଂ ଲରେନ୍ସ ବିଷ୍ଣୋଇର ଭାଇ ଅନମୋଲ ବିଷ୍ଣୋଇଠାରୁ ଗ୍ରୀନ ସିଗନାଲକୁ ଅପେକ୍ଷା କରିଥିଲେ। ଏହି ଚାର୍ଜସିଟରେ ୫୮ ବର୍ଷିୟ ଅଭିନେତାଙ୍କୁ ଗୁଳି କରିବା ପରେ କନ୍ୟାକୁମାରୀରେ ଏକାଠି ହେବା ପାଇଁ ସୁଟରଙ୍କ ଦ୍ୱାରା ପ୍ରସ୍ତୁତ ଏକ ଯୋଜନା ବିଷୟରେ ବିସ୍ତୃତ ବିବରଣୀ ଦିଆଯାଇଛି, ଯେଉଁଠାରୁ ସେମାନେ ଡଙ୍ଗାରେ ଶ୍ରୀଲଙ୍କା ଯାତ୍ରା କରିବେ ଏବଂ ପରେ ସେହି ଦେଶକୁ ଯିବେ ଯେଉଁଠାରେ ଭାରତୀୟ ଅନୁସନ୍ଧାନକାରୀ ସଂସ୍ଥା ସେମାନଙ୍କ ନିକଟରେ ପହଞ୍ଚି ପାରିବେ ନାହିଁ। ତେବେ ପାନଭେଲ ଫାର୍ମହାଉସରେ ସଲମାନ ଖାନଙ୍କୁ ଟାର୍ଗେଟ କରିବାର ଷଡଯନ୍ତ୍ର ଉନ୍ମୋଚିତ ହୋଇଥିଲା ଯେତେବେଳେ ପୋଲିସ ବାନ୍ଦ୍ରାସ୍ଥିତ ତାଙ୍କ ଘର ବାହାରେ ଗୁଳି ବିନିମୟ ଘଟଣାର ତଦନ୍ତ କରିଥିଲା।ବର୍ତମାନ ସମୟରେ ପୂର୍ବତନ ମନ୍ତ୍ରୀ ତଥା ଏନସିପି ନେତା ବାବା ସିଦ୍ଦିକଙ୍କ ହତ୍ୟା ପରେ ସଲମାନ ଖାନଙ୍କ ବାନ୍ଦ୍ରା ବାସଭବନ ବାହାରେ ସୁରକ୍ଷା ବୃଦ୍ଧି କରାଯାଇଛି।
