ଅମାନିଆ ମୋ ବସ ,ମୋ ବସ ଧକ୍କାରେ ହାତ ହରାଇଲେ ଯୁବତୀ …
1 min read
ଦିନକୁ ଦିନ ମୋ ବସ୍ ଚାଳକ ଅଧିକ ବେପରୁଆ ହୋଇଯାଉଛନ୍ତି । ଗାଡି ଚଳାଇବା ବେଳେ ଖାମଖିଆଲ ମନୋଭାବ ଯୋଗୁଁ ଚାଲିଯାଉଛି ନୀରିହ ଲୋକଙ୍କ ଜୀବନ । ଆଜି ପୁଣି ରାସ୍ତା କଡରେ ଛିଡା ହୋଇଥିବା ଜଣେ ଯୁବତୀଙ୍କ ସମେତ ମୋଟ ୨ ଜଣଙ୍କ ଉପରେ ମୋ ବସ୍ ଚଢିଯାଇଥିବା ଅଭିଯୋଗ ହୋଇଛି । ଚନ୍ଦ୍ରଶେଖରପୁର ପେଟ୍ରୋଲ ପମ୍ପ ନିକଟରେ ଯୁବତୀଙ୍କ ଉପରେ ମୋ ବସ୍ ଚଢ଼ି ଯିବାରୁ ତାଙ୍କ ବାମ ପଟ ହାତ କଟିଯାଇଥିବା ଏବଂ କାନ୍ଧ ହାଡ ଭାଙ୍ଗିଯାଇଥିବା ସୂଚନା ମିଳିଛି ।ଘଟଣାସ୍ଥଳରେ ୧୦୮ ଆମ୍ବୁଲାନ୍ସ ପହଞ୍ଚି ସଙ୍ଗେ ସଙ୍ଗେ ଯୁବତୀଙ୍କୁ ଉଦ୍ଧାର କରି ଗୁରୁତର ଅବସ୍ଥାରେ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଥିଲା ।
ସେପଟେ ଏଭଳି କାଣ୍ଡ ଘଟାଇ ଘଟଣା ସ୍ଥଳରୁ ଚମ୍ପଟ ମାରିଛି ଉକ୍ତ ମୋ ବସ୍ ଡ୍ରାଇଭର । ଯାହାପରେ ଘଟଣାସ୍ଥଳରେ ସ୍ଥାନୀୟ ଲୋକଙ୍କ ଉତ୍ତେଜନା ଦେଖିବାକୁ ମିଳିଛି । ସେହି ରୁଟ ଦେଇ ଯାଉଥିବା ସମସ୍ତ ମୋ ବସକୁ ଅଟକ ରଖି କ୍ଷୋଭ ପ୍ରକାଶ କରିଛନ୍ତି ସ୍ଥାନୀୟ ଲୋକେ । ଏଥିସହିତ ଆହତ ଯୁବତୀଙ୍କୁ କ୍ଷତିପୂରଣ ଏବଂ ମୋ ବସର ଏଭଳି ବେପରୁଆ ଗାଡି ଚାଳନା ଉପରେ କଡା କାର୍ଯ୍ୟାନୁଷ୍ଠାନ ଦାବିରେ ଅଡିବସିଛନ୍ତି ସ୍ଥାନୀୟ ଲୋକେ । ପରିସ୍ଥିତି ଅଣାୟତ୍ତ ହେବାରୁ ଚନ୍ଦ୍ରଶେଖରପୁର ଥାନା ପୋଲିସ ଓ ଫୋର୍ସ ଘଟଣା ସ୍ଥଳରେ ପହଞ୍ଚି ସ୍ଥିତି ନିୟନ୍ତ୍ରଣ କରିବାକୁ ଉଦ୍ୟମ ଜାରି ରଖିଛି।
