ଘର ଉପରେ ଚଢିଗଲା ମେଟାଲ ବୋଝେଇ ଡମ୍ପର , ଶୋଇଥିବା ଅବସ୍ଥାରେ ଚାପିହୋଇ ସ୍ୱାମୀ –ସ୍ତ୍ରୀ ଉଭୟ ମୃତ ।
1 min read
ବିଳମ୍ବିତ ରାତିରେ ରାସ୍ତା କଡରେ ଥିବା ଘର ଉପରେ ଓଲଟିଲା ମେଟାଲ ବୋଝେଇ ଡମ୍ପର । ମେଟାଲ ତଳେ ଚାପି ହୋଇ ସ୍ୱାମୀ ସ୍ତ୍ରୀ ମୃତ୍ୟୁ । ଅଳ୍ପକେ ରକ୍ଷା ପାଇଲେ ବୋହୁ ଓ ୭ବର୍ଷର ନାତି । ଗ୍ରାମବାସୀ ରାସ୍ତା ଉପରେ ଶବ ରଖି କ୍ଷତିପୁରଣ ଦାବୀ କରିଛନ୍ତି । ଏଭଳି ଏକ ଘଟଣା ବାଲେଶ୍ୱର ଜିଲ୍ଲା ଜଳେଶ୍ୱର ଥାନା ଅମ୍ବାଳିଅଠା ଠାରେ ଘଟିଛି ।
ଗତ ମଙ୍ଗଳବାର ବିଳମ୍ବିତ ରାତି ପାଖପାଖି ୨ଟା ସମୟରେ WB 33E4336 ନଂ ବିଶିଷ୍ଟ ଏକ ୧୦ଚକିଆ ଡମ୍ପର ମେଟାଲ ବୋଝେଇ କରି ପଶ୍ଚିମବଙ୍ଗ ଅଭିମୁଖେ ଯାଉଥିଲା । ଡ୍ରାଇଭର ବେପରୁଆ ଗାଡିଚାଳନା ଯାଗୁଁ ଆମ୍ବଳିଅଠା ସୋଲପଟା ରାସ୍ତାକଡ଼ରେ ଥିବା ଏକ ଘର ଡପରକୁ ମାଡିଯାଇଥିଲା । ଫଳରେ ଘର ଭିତରେ ଶୋଇଥିବା ସ୍ୱାମୀ ସୁଧୀର କୁମାର ଜେନା ଓ ସ୍ତ୍ରୀ ସବିତା ଜେନା ଉପରେ ମେଟାଲ ଢାଳି ହୋଇ ଯାଇଥିଲା ବେଳେ ପୁଅ ବୋହୁ ଓ ୭ବର୍ଷର ନାତି ଅଳ୍ପକେ ରକ୍ଷାପାଇଥିଲେ ।
ଗ୍ରାମବାସୀ ଖବର ପାଇ ଘଟଣା ସ୍ଥଳରେ ପହଁଚି ଉଭୟ ସ୍ୱାମୀସ୍ତ୍ରୀକୁ ମେଟାଲ ତଳୁ ଉଦ୍ଧାର କରିଥିଲା । ମାତ୍ର ସ୍ୱାମୀସ୍ତ୍ରୀଙ୍କର ମୃତ୍ୟୁ ଘଟିଥିଲା । ଏନେଇ ଗ୍ରାମବାସୀ କ୍ଷତି ପୁରଣ ଦାବୀ କରି ରାସ୍ତା ଉପରେ ଶବ ରଖି ରାସ୍ତା ଅବରୋଧ କରିଥିଲା ବେଳେ ଜଳେଶ୍ୱର ପୋଲିସ ଘଟଣା ସ୍ଥଳରେ ପହଂଚି ତଦନ୍ତ କରୁଥିବା ଦେଖିବାକୁ ମିଳିଛି ।
