ମୟୂରଭଞ୍ଜ ପୋଲିସକୁ ବଡ ସଫଳତା ; ଛିନତାଇ ହୋଇଥିବା ୭ ମୋବାଇଲ ଫୋନ୍ ହସ୍ତାନ୍ତର ସହ ବିଭିନ୍ନ ଚୋରି ଘଟଣାର ପର୍ଦ୍ଦାଫାସ…….
1 min read
ବାରିପଦା : ମୟୂରଭଞ୍ଜ ଜିଲ୍ଲା ପୋଲିସ କାର୍ଯ୍ୟାଳୟ ସମ୍ମିଳନୀ କକ୍ଷରେ ସୋମବାର ସନ୍ଧ୍ୟାରେ ଆୟୋଜିତ ସାମ୍ବାଦିକ ସମ୍ମିଳନୀରେ ମୟୂରଭଞ୍ଜ ଏସପି ଏସ.ସୁଶ୍ରୀ ଯୋଗଦେଇ ବାରିପଦା ଟାଉନ ପୋଲିସକୁ ମିଳିଥିବା ସଫଳତା ସମ୍ବନ୍ଧରେ ସୂଚନା ଦେଇଥିଲେ । ପ୍ରଥମେ ଗତ କିଛିଦିନ ଧରି ବାରିପଦା ସହରରୁ ଛିନ୍ତାଇ ହେଉଥିବା ମୋବାଇଲ ଫୋନ୍ ଘଟଣାର ପର୍ଦ୍ଦାଫାସ କରିବା ସହ ଏହି ଘଟଣାରେ ୪ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିବାବେଳେ ସେମାନଙ୍କ ମଧ୍ୟରେ ଜଣେ ନାବାଳକ ଅଟନ୍ତି । ଏମାନଙ୍କ ନିକଟରୁ ୬୨ଟି ମୋବାଇଲ ଫୋନ୍ ଓ ୪ଟି ମୋଟର ସାଇକେଲ ଜବତ କରାଯାଇଛି ।
ଆଜି ଆୟୋଜିତ ସାମ୍ବାଦିକ ସମ୍ମିଳନୀରେ ୭ଜଣଙ୍କୁ ସେମାନଙ୍କର ଚୋରି ହୋଇଥିବା ମୋବାଇଲ ଫୋନ୍ ଏସପି ହସ୍ତାନ୍ତର କରିଥିଲେ । ସେହିପରି ବାରିପଦା ସହରର ବିଭିନ୍ନ ଅଞ୍ଚଳରେ ଘରୁ ଚୋରି ହେଉଥିବା ନେଇ ଅଭିଯୋଗକୁ ଆଧାର କରି ବାରିପଦା ଟାଉନ ଥାନା ଆଇଆଇସି ମୃତ୍ୟୁଞ୍ଜୟ ପ୍ରଧାନ ଏକ ସ୍ୱତନ୍ତ୍ର ଟିମ୍ ଗଠନ କରିଥିଲେ । ୯ତାରିଖ ବିଳମ୍ବିତ ରାତିରେ ବାରିପଦା ଟାଉନ ଥାନା ପକ୍ଷରୁ ପେଟ୍ରୋଲିଂ କରାଯାଉଥିବାବେଳେ ପ୍ରଫୁଲନଗର ଲାଲସାହେବ ଛକ ନିକଟରେ ୬ଜଣ ଦୃର୍ବତ୍ତଙ୍କ ଗତିବିଧିକୁ ସନ୍ଦେହ କରାଯାଇ ଅଟକ କରାଯାଇଥିଲା ।
ସେମାନଙ୍କ ମଧ୍ୟରୁ ୪ଜଣ ନାବାଳକ ଥିବାବେଳେ ଦୁଇଜଣ ପେଶାଦାର ଦୃର୍ବତ୍ତ ଅଟନ୍ତି । ଏମାନଙ୍କ ଘରୁ ଚଢଉ କରାଯାଇ ଚୋରି ପାଇଁ ବ୍ୟବହୃତ ହେଉଥିବା ବିଭିନ୍ନ ସାମଗ୍ରୀ ଓ ମାରଣାସ୍ତ୍ର ଜବତ କରାଯିବା ସହ ନଗଦ ୪୬ହଜାର ୨ଶହ ୭୫ଟଙ୍କା ସହ ୮ଗୋଟି ମୋବାଇଲ ଫୋନ୍ ଜବତ କରାଯାଇଥିଲା । ଏଥିସହ ୨ଲକ୍ଷଟଙ୍କାରୁ ଉର୍ଦ୍ଧ୍ୱ ବିଭିନ୍ନ ସୁନାରୂପା ଅଳଙ୍କାରକୁ ଖଣ୍ଡ ଖଣ୍ଡ କରି ରଖିଥିବା ୧୬ଖଣ୍ଡ ଅଳଙ୍କାର ମିଳିଥିଲା । ଆଗାମୀ ଦିନରେ ପୋଲିସ ପକ୍ଷରୁ ପେଟ୍ରୋଲିଂକୁ କଡାକଡି କରାଯିବା ସହ ଚଢଉ ମଧ୍ୟ ଜୋରଦାରା କରାଯିବ ବୋଲି ଏସପି ଏସ.ସୁଶ୍ରୀ ସୂଚନା ଦେଇଥିଲେ ।
