(ଭିଡିଓ) ରେଳ ଧାରଣାରେ ପଡିଗଲେ ମା’ଛୁଆ ଉପରେ ଚାଲିଗଲା ଟ୍ରେନ, ବଞ୍ଚିଗଲା ଜୀବନ…

କଥାରେ ଅଛି ରଖେ ହରି ତ ମାରେ କିଏ? ଯାହାକୁ ଭଗବାନ ବଞ୍ଚାଇବାକୁ ଚାହାନ୍ତି ତାକୁ ଦୁନିଆର କୈାଣସି ଶକ୍ତି ବି ମାରିପାରେ ନାହିଁ । ସେହିଭଳି ଏକ ଲୋମ ଟାଙ୍କୁରା ଘଟଣା ଦେଖିବାକୁ ମିଳିଛି ବିହାରସ୍ଥିତ ପାଟନାର ବାଢ଼ ରେଲୱେ ଷ୍ଟେସନରେ । ଗତ ଶନିବାର ବାଢ ଷ୍ଟେସନରେ ଏକ ଟ୍ରେନରେ ଚଢ଼ିବାକୁ ଚେଷ୍ଟା କରୁଥିବା ବେଳେ ମା’ ଓ ତାଙ୍କର ଦୁଇଜଣ ସନ୍ତାନ ଧାରଣାକୁ ଖସି ପଡ଼ିଥିଲେ। ଆଉ ଏତିକିବେଳେ ସେମାନଙ୍କ ଉପର ଦେଇ ଦ୍ରୁତଗତିରେ ଚାଲିଯାଇଥିଲା ଟ୍ରେନ । କିନ୍ତୁ ସୈାଭାଗ୍ୟବଶତଃ ଏହି ଦୁର୍ଘଟଣାରେ ମା’ ଓ ତାଙ୍କ ଦୁଇପିଲାଙ୍କ ଜୀବନ ବଞ୍ଚିଯାଇଛି । ତେବେ ରବି କୁମାର ନାମକ ଏକ ବ୍ୟକ୍ତି ଯିଏକି ବେଗୁସରାଏରେ ବାସ କରନ୍ତି। ରବି ନିଜ ସ୍ତ୍ରୀ ଓ ଦୁଇ ପିଲାଙ୍କ ସହିତ ବିକ୍ରମଶିଳା ଏକ୍ସପ୍ରେସ ଟ୍ରେନ କୋଚ ନମ୍ବର ୮ରେ ବସି ଦିଲ୍ଲୀ ଯିବାକୁ ଷ୍ଟେସନରେ ପହଞ୍ଚିଥିଲେ। ଏହି ସମୟରେ ଷ୍ଟେସନରେ ଭିଡ଼ ଏତେ ଥିଲା କି ଟ୍ରେନରେ ଚଢ଼ୁଥିବା ବେଳେ ରବି କୁମାରଙ୍କ ସ୍ତ୍ରୀ ଓ ତାଙ୍କ ଦୁଇ ପିଲା ରେଳ ଧାରଣାକୁ ଖସି ପଡ଼ିଥିଲେ। ଆଉ ମା’ ଛୁଆଙ୍କ ଉପର ଦେଇ ଦ୍ରୁତଗତିରେ ଟ୍ରେନ ଚାଲିଯାଇଥିଲା । ହେଲେ ମା’ ତାର ଦୁଇଜଣ ପିଲାଙ୍କୁ ଛାତିରେ ଜାବୁଡ଼ି ଧରି ଧାରଣାରେ ସେମିତି ପଡ଼ି ରହିଥିଲା । ଏଦୃଶ୍ୟ ଦେଖି ମହିଳାଙ୍କ ସ୍ୱାମୀ ରବି କୁମାର ଆଶ୍ଚର୍ଯ୍ୟ ହୋଇଯାଇଥିଲେ । ସେ କଣ କରିବେ ବୋଲି କିଛି ଜାଣିପାରୁନଥିଲେ । କାରଣ ଆଖି ସାମ୍ନାରେ ତାଙ୍କ ଦୁଇପିଲା ଓ ସ୍ତ୍ରୀଙ୍କ ଉପର ଦେଇ ଟ୍ରେନ ଯାଉଥିଲା । ଘଟଣାସ୍ଥଳରେ ଉପସ୍ଥିତ ଥିବା ଲୋକେ ଭାବିଥିଲେ କି ଏହି ଘଟଣାରେ ମା’ ଓ ଦୁଇଶିଶୁଙ୍କ ଜୀବନ ଚାଲିଯାଇଛି । କିନ୍ତୁ ସୈାଭାଗ୍ୟବଶତଃ ମା’ ଓ ଦୁଇଶିଶୁଙ୍କ ଜୀବନ ବଞ୍ଚିଯାଇଥିଲା । ପରେ ପୁଲିସ ସୁରକ୍ଷିତ ଭାବେ ସେମାନଙ୍କୁ ଉଦ୍ଧାର କରିଥିଲା । ଏହି ଘଟଣାର ଭିଡିଓ ବି ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।