ପାରିବାରିକ ଅଦାଲତରେ ବିରଳ ରାୟ , ସ୍ୱାମୀ କୁ ମାସିକ ଭରଣପୋଷଣ ଦେବ ସ୍ତ୍ରୀ ..
1 min read
ଛାଡପତ୍ର ପରେ ସ୍ତ୍ରୀର ଭରଣପୋଷଣ ପାଇଁ ସ୍ୱାମୀକୁ ମାସିକ ଭତ୍ତା ଦେବାକୁ ପଡେ । କୋର୍ଟର ନିଷ୍ପତ୍ତି ଅନୁସାରେ ସ୍ୱାମୀକୁ ମାସିକ ଅର୍ଥ ଦେବାକୁ ପଡେ । ହେଲେ ଏବେ ବଦଳି ଯାଇଛି ନିୟମ । ଏବେ ସ୍ୱାମୀ ନୁହେଁ ସ୍ତ୍ରୀ ଦେବ ଭରଣପୋଷଣ । ଇନ୍ଦୋରର ଏକ ପାରିବାରିକ ଅଦାଲତରେ ଏଭଳି ଏକ ବିରଳ ରାୟ ଶୁଣାଇ ଛନ୍ତି ଜଜ୍ । ଜଣେ ମହିଳାତାଙ୍କ ସ୍ୱାମୀଙ୍କୁ ମାସିକ ୫,୦୦୦ ଟଙ୍କା ଭରଣପୋଷଣ ଦେବାକୁ ନିର୍ଦ୍ଦେଶ ଦେଇଛି କୋର୍ଟ ।
ସୂଚାନନୁସାରେ ୨୦୨୩ ଡିସେମ୍ବର ମାସରେ ମହିଳା ଜଣଙ୍କ ସ୍ୱାମୀ ବିରୁଦ୍ଧରେ ଘରୋଇ ହିଂସା ମାମଲା ଦାୟର କରିଥିଲେ ଏବଂ ଆଜି ଏହାର ରାୟ ପ୍ରକାଶ କରିଛି କୋର୍ଟ । ସ୍ୱାମୀ ପକ୍ଷରୁ ଲଢୁଥିବା ଓକିଲ ମନିଷ କହିଛନ୍ତି ଯେ, ତାଙ୍କ ମହକିଲ ଅମନ ଉଜ୍ଜୟିନୀର ବାସିନ୍ଦା । ୨୦୨୦ ମସିହାରେ ନିଜର କମନ ଫ୍ରେଣ୍ଡ ଜରିଆରେ ନନ୍ଦିନୀଙ୍କ ସହିତ ବନ୍ଧୁତା କରିଥିଲେ । ଉଭୟଙ୍କ ମଧ୍ୟରେ ସମ୍ପର୍କ ଆଗକୁ ବଢିଥିଲା । ପ୍ରାରମ୍ଭିକ ଅବସ୍ଥାରେ ଅମନ ନନ୍ଦିନୀଙ୍କୁ ବିବାହ କରିବାକୁ ଚାହୁଁ ନଥିଲେ, କିନ୍ତୁ ନନ୍ଦିନୀ ଆତ୍ମହତ୍ୟା କରିବାକୁ ଧମକ ଦେଇଥିଲେ । ଶେଷରେ ୨୦୨୧ ଆର୍ଯ୍ୟ ମନ୍ଦିରରେ ଅମନ ନନ୍ଦିନୀଙ୍କୁ ବିବାହ କରିଥିଲେ । ବିବାହ ପରେ ଏହି ଦମ୍ପତି ଇନ୍ଦୋରରେ ଏକ ଭଡା ଘରେ ରହିବା ଆରମ୍ଭ କରିଥିଲେ । ଅମନଙ୍କ ଓକିଲ କହିବା ମୁତାବକ, ବିବାହ ପରେ ନନ୍ଦିନୀ ଛୋଟ ଛୋଟ ପ୍ରସଙ୍ଗରେ ଅମନଙ୍କୁ ମାନସିକ ତଥା ଶାରୀରିକ ନିର୍ଯ୍ୟାତନା ଦେବା ଆରମ୍ଭ କରିଥିଲେ । ବିଭିନ୍ନ ବିବାଦରେ ଅମନ ତାଙ୍କୁ ଶାନ୍ତ କରିବାକୁ ଚେଷ୍ଟା କରିଥିଲେ, ତଥାପି ସେ ତାଙ୍କ କଥା ଶୁଣି ନଥିଲେ ।
ନନ୍ଦିନୀଙ୍କ ଅତ୍ୟାଚାରରେ ଅତିଷ୍ଠ ହୋଇ ଘର ଛାଡି ଅମନ ନିଜ ପିତାମାତାଙ୍କ ସହିତ ରହିବା ଆରମ୍ଭ କରିଥିଲେ । ଏନେଇ ନନ୍ଦିନୀ ଅମନଙ୍କ ନିଖୋଜ ସମ୍ପର୍କିତ ଏକ ମାମଲା ଇନ୍ଦୋରର ଏକ ପୋଲିସ ଷ୍ଟେସନରେ ଦର୍ଜ କରିଥିଲେ । ଅମନ ନିଜ ପରିବାରକୁ ନିଜ ସହିତ ଘଟିଥିବା ସମସ୍ତ ଘଟଣା ବିଷୟରେ ଅବଗତ କରାଇଥିଲେ । ଏହାର କିଛି ଦିନ ପରେ ନନ୍ଦିନୀ ଅମନଙ୍କ ବିରୁଦ୍ଧରେ ଘରୋଇ ହିଂସାର ମାମଲା ରୁଜୁ କରି ରକ୍ଷଣାବେକ୍ଷଣ ଭତ୍ତା ଦାବି କରିଥିଲେ । ଅମନ କୋର୍ଟରେ କହିଥିଲେ ଯେ ସେ ତାଙ୍କ ମାଙ୍କ ସହିତ ରହିବାକୁ ଚାହାଁନ୍ତି ଏବଂ ଯେତେ ବେଳେ ବି ସେ ଘର ଛାଡିବାକୁ ଚାହୁଁଥିଲେ ନନ୍ଦିନୀ ତାଙ୍କୁ ଘର ଭିତରକୁ ବନ୍ଦ କରିଦେଉଥିଲେ ।
ଅମନ କୋର୍ଟକୁ କହିଥିଲେ ଯେ ସେ ଜଣେ ଦ୍ୱାଦଶ ଶ୍ରେଣୀ ପାସ୍ଆଉଟ । ସେ ଉଚ୍ଚଶିକ୍ଷା ପାଇଁ କଲେଜରେ ଆଡମିଶନ ମଧ୍ୟ କରିଥିଲେ କିନ୍ତୁ ନନ୍ଦିନୀଙ୍କ ଲାଗି ସେ ପାଠ ପଢା ଛାଡିବାକୁ ବାଧ୍ୟ ହୋଇଥିଲେ । ବର୍ତ୍ତମାନ ସେ ଜଣେ ବେକାର ଅଟନ୍ତି । ସେ କୋର୍ଟରେ ନିଜେ ନନ୍ଦିନୀଙ୍କ ଠାରୁ ରକ୍ଷଣାବେକ୍ଷଣ ଭତ୍ତା ଦାବି କରି କହିଥିଲେ ଯେ ନନ୍ଦିନୀ ଏକ ବିଉଟି ପାର୍ଲର ଚଳାଉଛନ୍ତି । କିନ୍ତୁ ନନ୍ଦିନୀ ଏହାକୁ ଫାଙ୍କି ଦେଇଥିଲେ । କିନ୍ତୁ ଅମନଙ୍କ ଓକିଲ ନନ୍ଦିନୀ ଥାନାରେ କରିଥିବା ନିଖୋଜ ରିପୋର୍ଟକୁ ଉପସ୍ଥାପନ କରିଥିଲେ ଯେଉଁଥିରେ ନନ୍ଦିନୀ ଏକ ବିୟୁଟି ପାର୍ଲର ଚଳାଉଥିବା କଥା ଉଲ୍ଲେଖ ଥିଲା । ଉଭୟ ପକ୍ଷର ଦଲିଲ ଶୁଣିବା ପରେ କୋର୍ଟ ନନ୍ଦିନୀଙ୍କୁ ଅମନଙ୍କୁ ୫୦୦୦ ଟଙ୍କା ରକ୍ଷଣାବେକ୍ଷଣ ଭତ୍ତା ଦେବାକୁ ନିର୍ଦ୍ଦେଶ ଦେଇଥିଲେ । ଏହା ହେଉଛି ପ୍ରଥମ ମାମଲା ଯେଉଁଠି ସ୍ତ୍ରୀ ସ୍ୱାମୀକୁ ଦେବ ଭରଣପୋଷଣ ।
