ବେଆଇନ ଗୋ ଚାଲାଣ ପଡିଲା ମହଙ୍ଗା ; ଟାଟା ଏସି ଗାଡି ଧକ୍କାରେ ଭାଙ୍ଗିଲା ଦୋକାନ ଘର, ୨ ଗୋମାଫିଆ ଗୁରୁତର
1 min read
ବାଲେଶ୍ୱର : ବେଆଇନ ଗୋ ଚାଲାଣ ପଡିଲା ମହଙ୍ଗା। ଟାଟା ଏସି ଧକ୍କାରେ ଭାଙ୍ଗିଲା ଦୋକାନ ଘର। ୨ ଆହତ। ଗାଡି ଜବତ। ଚାନ୍ଦିପୁର ଥାନା ପାତ୍ରପଡା ଛକ ନିକଟରେ ଏଭଳି ଘଟଣା ଦେଖିବାକୁ ମିଳିଛି। ଚାନ୍ଦିପୁର ଥାନା ଡିଫେନ୍ସ ରାସ୍ତାରେ ଗୋମାଫିଆ ଗୁରୁବାର ବିଳମ୍ବିତ ରାତି ପ୍ରାୟ ୨.୩୦ ରେ ନମ୍ବର ବିହିନ ଗୋଟିଏ ପିକଅପ ଭ୍ୟାନ ଓ ଗୋଟିଏ ଟାଟା ଏସି ଗାଡିରେ ବେଆଇନ ଗୋଚାଲାଣ କରୁଥିଲେ।
ଦୃତ ଗତିରେ ୨ଟି ଗାଡି ପାତ୍ରପଡା ପେଟ୍ରୋଲ ଟାଙ୍କି କ୍ରସ କରୁଥିବାବେଳେ ଗୋ ବୋଝେଇ ଟାଟା ଏସି ଗାଡି ଭାରସାମ୍ୟ ହରାଇ ଏକ ଦୋକାନକୁ ଧକ୍କା ଦେଇଥିଲା। ଫଳରେ ଦୋକାନ ଘର ଭାଙ୍ଗିବା ସହ ଦୋକାନର ଜିନିଷପତ୍ର ମଧ୍ୟ ନଷ୍ଟ ହୋଇଥିଲା। ଗାଡିଟି ଓଲଟି ପଡି ଭାଙ୍ଗି ଯାଇଥିବାବେଳେ ଏଥିରେ ୨ ଜଣ ଗୋ ମାଫିଆ ଚାପି ହୋଇ ଗାଡି ମଧ୍ୟରେ ରହିଯାଇଥିଲେ। ଏହା ଦେଖି ସ୍ଥାନୀୟ ଲୋକେ ପୁଲିସକୁ ଖବର ଦେଇଥିଲେ।
ପୁଲିସ ଓ ଅଗ୍ନିଶମ କର୍ମଚାରୀ ଉପସ୍ଥିତରେ ୨ ଗୋମାଫିଆଙ୍କୁ ଉଦ୍ଧାର କରାଯାଇ ବାଲେଶ୍ଵର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଯିବା ସହ ୨ ଗୋରୁ ଉଦ୍ଧାର କରାଯାଇଛି। ଟାଟା ଏସି ଗାଡିକୁ ଜବତ କରିଛି ପୁଲିସ। ମାତ୍ର ଘଟଣାସ୍ଥଳରୁ ଗୋବେଝେଇ ପିକଅପ ଭ୍ୟାନ ଚମ୍ପଟ ମାରିଛି। ଥାନାରେ ଅଭିଯୋଗ ପରେ ପୁଲିସ ଏହି ଘଟଣାରେ ତଦନ୍ତ ଆରମ୍ଭ କରିଛି।
