ରିଲିଜ୍ ହେଲା ଦମନ୍‌ର ହିନ୍ଦି ଟିଜର୍ : ବଲିଉଡ୍‌ର ବଡ ବଡ ସେଲିବ୍ରେଟି କଲେ ଏଭଳି ପ୍ରଶଂସା

ଭୁବନେଶ୍ୱର : ରିଲିଜ ହେଲା ଓଲିଉଡର ଲୋକପ୍ରିୟ ଅଭିନେତା ବାବୁସାନଙ୍କ ସୁପରହିଟ୍ ଫିଲ୍ମ ‘ଦମନ’ର ହିନ୍ଦୀ ରୂପାନ୍ତରର ଦମଦାର ଟ୍ରେଲର । ଭିନ୍ନ କାହାଣୀକୁ ନେଇ ସାରା ଓଡ଼ିଶାରେ ଚର୍ଚ୍ଚାର ବିଷୟ ପାଲଟିଥିବା ଏହି ଫିଲ୍ମକୁ ଏବେ ହିନ୍ଦୀ ଦର୍ଶକ ମଧ୍ୟ ଦେଖିପାରିବେ । ଆଜି ବଲିଉଡ୍ ପ୍ରଯୋଜନା ସଂସ୍ଥା ପାନୋରମା ଷ୍ଟୁଡିଓଜ ଚ୍ୟାନେଲରେ ଏହାର ଟ୍ରେଲର ରିଲିଜ୍ ହୋଇଛି ।ବଲିଉଡ଼୍ ଅଭିନେତା ଅଜୟ ଦେବଗନ୍ ଏହାକୁ ନେଇ ଟୁଇଟ୍ କରି ସୂଚନା ଦେଇଛନ୍ତି । ଏବଂ କ୍ୟାପସନ୍‌ରେ ଲେଖିଛନ୍ତି ଯେତେବେଳେ ପରିବର୍ତ୍ତନ ଦିଗରେ ଏକ ପଦକ୍ଷେପ ନିଆଯିବ, ସେତେବେଳେ ଏକ ନୂତନ ଉଦାହରଣ ସୃଷ୍ଟି ହେବ । ଏହାସହ ବଲିଉଡ୍‌ର ଆକ୍ସନ ହିରୋ ବିଦ୍ୟୁତ୍ ମଧ୍ୟ ଏକ ଟ୍ୟୁଇଟ୍ କରି ଫିଲ୍ମଟିର ଖୁବ୍ ପ୍ରଶଂସା କରିଛନ୍ତି । ସେ କହିଛନ୍ତି ଯେ ଦମନ ହେଉଛି ଆଶାର ଏକ ଭିନ୍ନକିରଣ ।

ତେବେ ଏହି ଫିଲ୍ମରେ ବାବୁସାନଙ୍କ ହିନ୍ଦୀ ଭଏସ ଦେଇଛନ୍ତି ସଙ୍କେତ ମେହେତା । ବାବୁସାନଙ୍କ ଅଭିନୀତ ‘ଦମନ୍‌’ ରାଜ୍ୟର ମାଓଅଧ୍ୟୁଷିତ ଅଞ୍ଚଳରେ ସ୍ୱାସ୍ଥ୍ୟସେବା ପହଞ୍ଚାଇବାକୁ ଊଦ୍ୟମ କରି ସଫଳ ହୋଇଥିବା ଜଣେ ଡାକ୍ତରଙ୍କ ସଂଘର୍ଷମୟ କାହାଣୀ।

ସେପଟେ ଓଡ଼ିଶା ସରକାରଙ୍କ ମ୍ୟାଲେରିଆ ନିରାକରଣ କାର୍ଯ୍ୟକ୍ରମ ଉପରେ ଉପସ୍ଥାପିତ ହୋଇଥିବା ଏହି ଫିଲ୍ମଟି ସମସ୍ତଙ୍କ ମନ କିଣିଥିଲା । ଫିଲ୍ମରେ ବାବୁସାନଙ୍କ ଦମଦାର ଅଭିନୟର ବେଶ୍ ପ୍ରଶଂସା କରାଯାଇଥିଲା । ଲୋକପ୍ରିୟତା ବଢ଼ିବା ପରେ ‘ଦମନ’କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କରମୁକ୍ତ ଘୋଷଣା କରିଥିଲେ । ଓଡ଼ିଆ ଚଳଚ୍ଚିତ୍ର ପ୍ରତି ଉଦାସୀନ ହୋଇ ଉଠିଥିବା ଦର୍ଶକଙ୍କୁ ପୁଣି ଥରେ ଫିଲ୍ମ ହଲକୁ ଟାଣି ଆଣିଥିଲା ‘ଦମନ’ର ଦମଦାର କାହାଣୀ । ସେହିପରି ଆଶା କରାଯଅଉଛି ଯେ ଏହା ହିନ୍ଧି ଦର୍ଶକମାନଙ୍କ ମନକୁ ମଧ୍ୟ ସେତିକି ମାତ୍ରାରେ କିଣିବ ।