ହଳ କରୁଥିଲେ ଟ୍ରାକ୍ଟର ସହ ମୁକୁଳା କୂଅରେ ଗଳିପଡ଼ିଲେ ଚାଳକ, ଘଟଣା ସ୍ଥଳରେ ମୃତ୍ୟୁ…..
1 min read
ଅନୁଗୋଳ : ହଳ କରୁ କରୁ ମୁକୁଳା କୂଅରେ ଗଳିପଡିଲେ ଚାଳକ । ଏଭଳି ଏକ ଅଘଟଣ ଅନୁଗୋଳ ଜିଲ୍ଲା ଜାମୁଣ୍ଡା ଗ୍ରାମରେ ଘଟିଛି । ଆଜି ଚାଷ ଜମିରେ ଚାଷ କରୁଥିବା ବେଳେ ଅସାବଧାନତା ଯୋଗୁଁ ଖୋଲା କୂଅ ଭିତରକୁ ଏକ ଟ୍ରାକ୍ଟର ଗଳିପଡିଛି। ଏହି ଦୁର୍ଘଟଣାରେ ଟ୍ରାକ୍ଟର ଚାଳକଙ୍କ ମୃତ୍ୟୁ ହୋଇଛି। ମୃତ ଡ୍ରାଇଭର ହେଲେ ପୂର୍ଣ୍ଣଚନ୍ଦ୍ର ବେହେରା (୩୦)।
ସୂଚନା ଯେ, ଅନୁଗୋଳ ଜିଲ୍ଲା ନିଶା ଥାନା ଅନ୍ତର୍ଗତ ଜାମୁଣ୍ଡା ଗ୍ରାମରେ ଓଡ଼କପା ଗ୍ରାମର ପୂର୍ଣ୍ଣଚନ୍ଦ୍ର ବେହେରା ଟ୍ରାକ୍ଟର ସାହାଯ୍ୟରେ ବିଲରେ ଚାଷ କରୁଥିଲେ। ଚାଷ ଜମି ପାଖକୁ ଲାଗି ଏକ ମୁକୁଳା ଗଭୀର କୂଅ ଥିବା ବିଷୟରେ ସେ ଜାଣି ନଥିଲେ। ଅସାବଧାନତା ଯୋଗୁଁ ସେ ଟ୍ରାକ୍ଟର ସହ କୂଅ ଭିତରେ ଖସି ପଡ଼ିଥିଲେ।
ଖବର ପାଇ ଅନୁଗୋଳ ଅଗ୍ନିଶମ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଟ୍ରାକ୍ଟର ସମେତ ଚାଳକଙ୍କୁ ଉଦ୍ଧାର କରିଥିଲେ। କିନ୍ତୁ ସେତେବେଳକୁ ଚାଳକଙ୍କ ମୃତ୍ୟୁ ହୋଇ ସାରିଥିଲା। ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲେ ମଧ୍ୟ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
