ନୀତିନ ଗଡ଼କରୀଙ୍କ ବଡ଼ ଘୋଷଣା , ସଡ଼କ ଦୁର୍ଘଟଣାଗ୍ରସ୍ତଙ୍କୁ ମିଳିବ ମାଗଣା ଚିକିତ୍ସା ..

କେନ୍ଦ୍ର ମନ୍ତ୍ରୀ କଲେ ବଡ଼ ଘୋଷଣା  । ସଡ଼କ ଦୁର୍ଘଟଣାରେ ଆହତ ବ୍ୟକ୍ତିଙ୍କୁ ତୁରନ୍ତ ମିଳିବ ନଗଦ ବିହୀନ ଚିକିତ୍ସା । ଖୁବ୍‌ଶୀଘ୍ର ସଡ଼କ ଦୁର୍ଘଟଣାରେ ଆହତ ବ୍ୟକ୍ତିଙ୍କୁ ନଗଦ ବିହୀନ ଚିକିତ୍ସା ମିଳିବ। ଏନେଇ ନ୍ୟାଶନାଲ ହେଲ୍‌ଥ୍‌ ଅଥରିଟି(ଏନ୍‌ଏଚ୍‌ଏ) ସହଯୋଗରେ କେନ୍ଦ୍ର ସରକାର ଯୋଜନା ପ୍ରସ୍ତୁତ କରିଥିବା ନେଇ ଗୁରୁବାର କେନ୍ଦ୍ର ସଡ଼କ, ପରିବହନ ଓ ରାଜମାର୍ଗ ମନ୍ତ୍ରୀ ନୀତିନ ଗଡ଼କରୀ ଲୋକ ସଭାରେ ସୂଚନା ଦେଇଛନ୍ତି। ପରୀକ୍ଷାମୂଳକ ଭାବେ ଏହି ଯୋଜନାକୁ ଚଣ୍ଡିଗଡ଼ ଓ ଆସାମରେ କାର୍ଯ୍ୟକାରୀ କରାଯାଇଥିବା ସେ କହିଛନ୍ତି।

ଯୋଜନା ଅନୁଯାୟୀ, ଯୋଗ୍ୟ ଆହତ ବ୍ୟକ୍ତିଙ୍କୁ ଆୟୁଷ୍ମାନ ଭାରତ-ପ୍ରଧାନମନ୍ତ୍ରୀ ଜନ୍‌ ଆରୋଗ୍ୟ ଯୋଜନା ଅଧୀନ ହସ୍ପିଟାଲଗୁଡ଼ିକରେ ଦୁର୍ଘଟଣାର ସର୍ବାଧିକ ୭ ଦନ ମଧ୍ୟରେ ଟ୍ରମା ଏବଂ ପଲିଟ୍ରମା ସମ୍ବନ୍ଧିତ ସ୍ବାସ୍ଥ୍ୟ ସୁବିଧା ପ୍ୟାକେଜ ମିଳିପାରିବ। ଯେ କୌଣସି ରାସ୍ତାରେ ମୋଟର ଯାନ ବ୍ୟବହାର ଦ୍ୱାରା ସଡ଼କ ଦୁର୍ଘଟଣାର ଶିକାର ହେଉଥିବା ବ୍ୟକ୍ତିଙ୍କୁ ନଗଦବିହୀନ ଚିକିତ୍ସା ସେବା ଯୋଗାଇବା ନିମନ୍ତେ ଏହି ଯୋଜନା ପ୍ରସ୍ତୁତ ହୋଇଥିବା ଗଡ଼କରୀ କହିଛନ୍ତି। ମୋଟର ଯାନ ଅଧିନିୟମ ୧୯୮୮ର ଧାରା ୧୬୪-ବି ଅନୁଯାୟୀ ଗଠିତ ମୋଟରଯାନ ଦୁର୍ଘଟଣା ପାଣ୍ଠି ଅଧୀନରେ ଏହି ଯୋଜନା ପରିଚାଳିତ ହେବ।