ସୋନିଆ ଗାନ୍ଧୀଙ୍କ ଜନ୍ମଦିନରେ ତେଲେଙ୍ଗାନାକୁ ଉପହାର ଦେଲେ ସିଏମ ରେଡ୍ଡୀ, ଆଗାମୀ ୧୦୦ ଦିନରେ ମିଳିବ ଆଉ ୪ଟି ଉପହାର..
1 min read
ମୁଖ୍ୟମନ୍ତ୍ରୀ ପଦକୁ ଆସିବା ପରେ ତôତପର ହୋଇଛି ରେଡ୍ଡୀ ସରକାର । ରେବାନ୍ତ ରେଡ୍ଡୀ ମୁଖ୍ୟମନ୍ତ୍ରୀ ହେବା ପୂର୍ବରୁ ଜନତାଙ୍କୁ ଦେଇଥିବା ପ୍ରତିଶ୍ରୁତି କୁ ପ୍ରଥମେ ରକ୍ଷା କରିଥିଲେ । ଶପଥ ଗ୍ରହଣ କରିବା ପୂର୍ବରୁ ପ୍ରଗତି ଭବନ ତଥା ସିଏମ୍ ବାସଭବନ ନିକଟରେ ଥିବା ବାଡ଼କୁ ବୁଲଡୋଜର ସାହାଯ୍ୟରେ ହଟାଇ ଦିଆଯାଇଥିଲା । ଜନସାଧାରଣଙ୍କ ପ୍ରବେଶ ଏବଂ ଟ୍ରାଫିକ ଗତିବିଧିକୁ ସହଜ କରିବା ପାଇଁ ପ୍ରଗତି ଭବନ ସମ୍ମୁଖରେ ସ୍ଥାପିତ ଲୁହା ବ୍ୟାରିକେଡ ଗୁଡ଼ିକୁ ହଟାଇ ଦେଇଥିଲେ ମୁଖ୍ୟମନ୍ତ୍ରୀ । ତେବେ ପୁଣି ଆଜି ଆଉଏକ ବଡ ଘୋଷଣା କରିଛନ୍ତି । ରାଜ୍ୟ ପରିବହନ ନିଗମ ବସ୍ରେ ମହିଳା ଏବଂ ଟ୍ରାନ୍ସଜେଣ୍ଡରଙ୍କ ପାଇଁ ମାଗଣା ଯାତ୍ରା କରିବାର ଦେଇଥିବା ପ୍ରତିଶ୍ରୁତି ତେଲେଙ୍ଗାନାର ରେବାନ୍ତ ରେଡ୍ଡୀ ସରକାର ପୂରଣ କରିଛନ୍ତି ।
ନିକଟରେ ଅନୁଷ୍ଠିତ ବିଧାନସଭା ନିର୍ବାଚନରେ କଂଗ୍ରେସ ଦଳ ଦ୍ୱାରା ଦିଆଯାଇଥିବା ୬ଟି ଗ୍ୟାରେଣ୍ଟି ମଧ୍ୟରୁ ଦୁଇଟିକୁ କାର୍ଯ୍ୟକାରୀ କରିବା ପାଇଁ ଶନିବାର ତେଲେଙ୍ଗାନା ସିଏମ୍ ରେଡ୍ଡି ଆରମ୍ଭ କରିଛନ୍ତି । ଟିଏସଆରଟିସି ବସରେ ମହିଳାମାନଙ୍କ ପାଇଁ ମାଗଣା ଯାତ୍ରା ଆରମ୍ଭ କରିବା ବ୍ୟତୀତ ରାଜୀବ ଆରୋଗ୍ୟସ୍ରୀ ସ୍କିମ୍ ଅନ୍ତର୍ଗତ କଭରେଜକୁ ବର୍ତ୍ତମାନର ୫ ଲକ୍ଷରୁ ୧୦ ଲକ୍ଷ ଟଙ୍କାକୁ ବୃଦ୍ଧି କରିବାକୁ ସିଏମ୍ ଏହି ଯୋଜନା ଉଦଘାଟନ କରିଛନ୍ତି ।
ବିଧାନସଭା କମ୍ପେ୍ଲକ୍ସରେ ମହିଳା କ୍ୟାବିନେଟ ଏବଂ କଂଗ୍ରେସ ବିଧାୟକଙ୍କ ଉପସ୍ଥିତିରେ ମହିଳା ମନ୍ତ୍ରୀ ସେଥକ୍କା ଏବଂ କୋଣ୍ଡା ସୁରେଖା ବସ୍ରୁ ଫ୍ଲାଗ୍ କରିଥିଲେ । ମୁଖ୍ୟ ଶାସନ ସଚିବ ଶାନ୍ତି କୁମାରୀ ଏବଂ ବକ୍ସିଂ ଚାମ୍ପିଅନ୍ ନିହାତ୍ ଜରିନ୍ ମଧ୍ୟ ଉପସ୍ଥିତ ଥିଲେ ।
ସୋନିଆ ଗାନ୍ଧୀଙ୍କ ଜନ୍ମଦିନ ଅବସରରେ ତେଲେଙ୍ଗାନା ମହିଳା ଏବଂ ଟ୍ରାନ୍ସଜେଣ୍ଡଙ୍କୁ ଏହି ଉପହାର ଦିଆଯାଇଛି । ଏହି କାର୍ଯ୍ୟକ୍ରମରେ ସିଏମ୍ ରେବାନ୍ତ ରେଡ୍ଡୀ, ଡେପୁଟି ସିଏମ୍ ମଲୁ ଭଟ୍ଟୀ ବିକ୍ରମାର୍କା, ପ୍ରୋ ଟେମ୍ ସ୍ପିକର ଆକବରଉଦ୍ଦିନ ଓୱାଇସି ଏବଂ ମନ୍ତ୍ରୀମାନେ ଟିଆରଏସ୍ଟିସି ଜିରୋ ଟିକେଟ୍ ଏବଂ ରାଜୀବ ଆରୋଗ୍ୟସ୍ରୀ ସ୍କିମର ନୂତନ ଲୋଗୋ ଏବଂ ପୋଷ୍ଟର ଉନ୍ମୋଚନ କରିଛନ୍ତି । ଏହି ଅବସରରେ ସିଏମ ରେଡ୍ଡୀ କହିଛନ୍ତି ଯେ ଦଳର ନେତା ସୋନିଆ ଗାନ୍ଧୀଙ୍କ ଜନ୍ମଦିନରେ କଂଗ୍ରେସ ସରକାର ଦେଇଥିବା ଏହାର ୬ଟି ପ୍ରତିଶୃତି ରୁ ୨ଟିକୁ ପୂରା କରିଛି ।
ଆହୁରି ମଧ୍ୟ କହିଛନ୍ତି ଯେ ଡିସେମ୍ବର ୯ ତେଲେଙ୍ଗାନା ପାଇଁ ବିଶେଷ ମହତ୍ୱ ରଖିଛି କାରଣ ୨୦୦୯ ରେ ଏହି ଦିନ ତତ୍କାଳୀନ ୟୁପିଏ ସରକାର ତେଲେଙ୍ଗାନା ରାଜ୍ୟ ଗଠନ ପ୍ରକ୍ରିୟା ଆରମ୍ଭ କରିବାକୁ ଘୋଷଣା କରିଥିଲେ । ରେଡ୍ଡୀ ସୋନିଆ ଗାନ୍ଧୀଙ୍କୁ ତେଲେଙ୍ଗାନାର ମାତା ବୋଲି ବର୍ଣ୍ଣନା କରିଛନ୍ତି ।
ଦୁଇଟି ଯୋଜନା ଆରମ୍ଭ କରି ସିଏମ କହିଛନ୍ତି ଯେ ତେଲେଙ୍ଗାନାକୁ ଏକ କଲ୍ୟାଣକାରୀ ରାଜ୍ୟ କରିବା ପାଇଁ ସମସ୍ତ ୬ଟି ପ୍ରତିଶୃତିକୁ୧୦୦ ଦିନରେ ଭିତରେ ପୁରା କରାଯିବ । ସମସ୍ତ ବୟସ ବର୍ଗର ବାଳିକା, ମହିଳା ଏବଂ ଟ୍ରାନ୍ସଜେଣ୍ଡର ବ୍ୟକ୍ତି, ଯେଉଁମାନେ ତେଲେଙ୍ଗାନାର ମୂଳ ଅଟନ୍ତି, ସେମାନେ ରାଜ୍ୟ ସୀମା ମଧ୍ୟରେ ତେଲେଙ୍ଗାନା ରାଜ୍ୟ ସଡକ ପରିବହନ ନିଗମ ବସ୍ ରେ ମାଗଣାରେ ଯାତ୍ରା କରିପାରିବେ ।
