ରାଇସ୍ ମିଲର ଆବର୍ଜନା ନେଉଛି ଗୋରୁଙ୍କ ଜୀବନ, ଏଯାଏଁ ଗଲାଣି ପ୍ରାୟ ୧୫ରୁ ଅଧିକ
1 min read
ଉଦଳା : ରାଇସ୍ ମିଲରୁ ବାହାରୁଥିବା ବର୍ଜ୍ୟବସ୍ତୁ ଏବଂ ପଚା ଚାଉଳର ପାଣି ପିଇ ମରୁଛନ୍ତି ଗୋରୁ । ଯାହାକୁ ନେଇ ଆସିଛି ସାଂଘାତିକ ଅଭିଯୋଗ । ରାଇସ୍ ମିଲରେ ବାହାରୁଥିବା କେମିକାଲ ମିଶ୍ରିତ ବର୍ଜ୍ୟବସ୍ତୁ ବାହାରେ ପଡିବା ସହିତ ପଚା ଚାଉଳ ଏବଂ ପାଣି ବାହାରେ ରହିବାରୁ ତାହାକୁ ପିଇ ଗୋରୁଙ୍କ ମୃତ୍ୟୁ ହେବାର ଅଭିଯୋଗ ଆଣିଛନ୍ତି ସ୍ଥାନୀୟ ଲୋକେ । ଉଦଳା ଥାନା ଅଧିନ କୁଟଲିଂ ନୂଆସାହି ଗ୍ରାମରେ । ଏହି ଗ୍ରାମବାସୀଙ୍କ ଅନେକ ଗୋରୁ ହଠାତ୍ ଦେହ ଅସୁସ୍ଥ ହୋଇ ମୃତ୍ୟୁବରଣ କରୁଛନ୍ତି ।
ଗ୍ରାମ ନିକଟରେ ହୋଇଥିବା ରାଇସ୍ ମିଲରୁ ବାହାରୁଥିବା ବର୍ଜ୍ୟବସ୍ତୁକୁ ମିଲ୍ ବାହାରେ ଢାଳିଦେବା ସହିତ ଖରାପ ପାଣିକୁ ବାହାରେ ରଖାଯାଇଛି । ତତସହିତ ରାଇସ୍ ମିଲରୁ ବାହାରୁଥିବା ପଚି ନଷ୍ଟ ହୋଇଥିବା କେମିକାଲ ମିଶ୍ରିତ ଚାଉଳକୁ ବାହାରେ ପକାଇବା ଫଳରେ ତାହାକୁ ଖାଇ କୁଟଲିଂ, ନୂଆସାହି, ବହୁବନ୍ଧ ଆଦି ଗ୍ରାମବାସୀଙ୍କ ଗୋରୁଙ୍କର ମୃତ୍ୟୁ ହେଉଛି । ଗୋରୁମାନେ ଚରିବା ସମୟରେ ଏହାକୁ ଖାଇବା ପରେ ସେମାନଙ୍କ ପେଟ ଫୁଲିବା ପରେ ସେମାନେ ଅସୁସ୍ଥ ହୋଇ ପଡୁଛନ୍ତି ।
ଗତ ୧୦ ଦିନ ମଧ୍ୟରେ ୧୫ ରୁ ଅଧିକ ଗୋରୁଙ୍କ ମୃତ୍ୟୁ ହୋଇଥିବାର ଅଭିଯୋଗ ଆଣିଛନ୍ତି ଗ୍ରାମବାସୀ । ଏ ବାବଦରେ ଉକ୍ତ ରାଇସ୍ ମିଲର ମାଲିକଙ୍କୁ ଯୋଗାଯୋଗ କରାଯାଇଥିଲେ ସୁଦ୍ଧା ସେ କୌଣସି ପ୍ରତିକ୍ରିୟା ଦେବାକୁ ନାରାଜ ହୋଇଥିଲେ ।
