ଭଙ୍ଗା ହାତରେ ଆସି ଅଭୟାଙ୍କ ପାଇଁ ନ୍ୟାୟ ମାଗିଲେ ମିଥୁନ …
ବଲିଉଡ ଅଭିନେତା ମିଥୁନ ଚକ୍ରବର୍ତ୍ତୀଙ୍କ ହାତ ଭାଙ୍ଗି ଯାଇଛି। ହେଲେ ଏହି ଅବସ୍ଥାରେ ମଧ୍ୟ ନ୍ୟାୟ ପାଇଁ କୋଲକାତା ରାସ୍ତାରେ ରାଲି କରୁଥିବା ଦେଖିବାକୁ ମିଳିଥିଲା। ବୁଧବାର ମିଥୁନଙ୍କ ସମେତ ଶତାଧିକ ବିଜେପି ସମର୍ଥକ କୋଲକାତା ରାଜରାସ୍ତା କୁ ଓହ୍ଲାଇ ପ୍ରତିବାଦ କରିଥିଲେ । ମିଥୁନ ଏବଂ ପୂର୍ବତନ କେନ୍ଦ୍ର ମନ୍ତ୍ରୀ ସୁଭାଷ ସରକାରଙ୍କ ନେତୃତ୍ୱରେ ଅନେକ ଟାଣୁଆ ନେତା ଓ କର୍ମୀ ଏହି ରାଲିରେ ଯୋଗଦେଇଥିଲେ । ନିକଟରେ ‘ଆର.ଜି କର’ ମେଡିକାଲରେ ଜଣେ ମହିଳା ଡାକ୍ତରଙ୍କ ସହିତ ଘଟିଥିବା ସେହି ବିଭତ୍ସ ଘଟଣା ପାଇଁ ରାଲି କରାଯାଇଥିଲା ।
ସୂଚନାନୁଯାୟୀ କିଛି ସପ୍ତାହ ପୂର୍ବରୁ ମିଥୁନ ଚକ୍ରବର୍ତ୍ତୀଙ୍କ ହାତ ଭାଙ୍ଗି ଯାଇଥିଲା । ଏବଂ ସେ ସେହି ଅବସ୍ଥାରେ ମଧ୍ୟ ‘ଆର.ଜି କର’ ଡାକ୍ତରଖାନାରେ ଘଟିଥିବା ଘଟଣାର ନ୍ୟାୟ ଦାବି କରି କୋଲକାତା ରାଜରାସ୍ତାକୁ ଓହ୍ଲାଇଥିଲେ । ସ୍ୱାସ୍ଥ୍ୟଗତ ସମସ୍ୟା ହେତୁ ସେ ପାଦରେ ଚାଲୁ ନଥିଲେ, ବରଂ ତାଙ୍କୁ ଏକ ଖୋଲା ଜିପ୍ ର ଆଗ ସିଟରେ ବସି କାର୍ଯ୍ୟକ୍ରମରେ ଅଂଶଗ୍ରହଣ କରୁଥିବା ଦେଖିବାକୁ ମିଳିଥିଲା | ୧୮୯୩ ମସିହାରେ ଚିକାଗୋର ବିଶ୍ୱ ଧର୍ମ ସଂସଦରେ ସ୍ବାମୀ ବିବେକାନନ୍ଦଙ୍କ ଐତିହାସିକ ଭାଷଣ ସ୍ମୃତିରେ ଏହି ରାଲିର ଆୟୋଜନ କରାଯାଇଥିଲା। ଏହି ରାଲି କଲକାତା ସେଣ୍ଟ୍ରାଲର ଶିମଲା ରୋଡସ୍ଥିତ ସ୍ୱାମୀ ବିବେକାନନ୍ଦଙ୍କ ପୈତୃକ ଘରୁ ଆରମ୍ଭ ହୋଇ ଶ୍ୟାମବଜାର ଫାଇଭ ପଏଣ୍ଟ କ୍ରସିଂରେ ଶେଷ ହୋଇଥିଲା।
ଏହି କାର୍ଯ୍ୟକ୍ରମର ଆୟୋଜକମାନେ କହିଛନ୍ତି ଯେ ସ୍ୱାମୀ ବିବେକାନନ୍ଦଙ୍କ ଆଦର୍ଶକୁ ସ୍ମରଣ କରିବା ପାଇଁ ଏହି ରାଲି କରାଯାଇଥିଲା | ସେପ୍ଟେମ୍ବର ୧୧, ୧୮୯୩ ମସିହାରେ ସ୍ବାମୀ ବିବେକାନନ୍ଦ ବିବେକାନନ୍ଦ ଆମେରିକାର ଚିକାଗୋ ସହରରେ ସମଗ୍ର ବିଶ୍ୱରେ ଚେତନା ଜାଗ୍ରତ କରିଥିଲେ | | କିନ୍ତୁ ଆଜି, ୧୩୧ ବର୍ଷ ପରେ, ନିଜ ସହର କୋଲକାତାରେ ଆର.ଜି କର ହସ୍ପିଟାଲରେ ମହିଳା ଡାକ୍ତର ସହ ଘଟିଥିବା ଜଘନ୍ୟ ଘଟଣା ସମଗ୍ର ସମାଜର ମାନବିକତାକୁ ଥରାଇ ଦେଇଛି। ତେଣୁ ଏକ ପ୍ରତିବାଦ ସ୍ୱରୂପ ସେ ଚିକାଗୋ ଭାଷଣ ଦିନ ଏହି କାର୍ଯ୍ୟକ୍ରମର ଆୟୋଜନ କରିଥିଲେ। ଏହି ରାଲିରେ ଯୋଗଦେଇଥିବାରୁ ଲୋକମାନେ ମିଥୁନ ଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି। ମିଥୁନ ଚକ୍ରବର୍ତ୍ତୀ ସାମ୍ବାଦିକମାନଙ୍କୁ କହିଛନ୍ତି, ‘‘ଏହି ବିରୋଧ ଥମିବା ଉଚିତ୍ ନୁହେଁ। ବେଙ୍ଗଲ୍ ଏହାର ବୈପ୍ଳବିକ ଇତିହାସ ଏବଂ ଅତ୍ୟାଚାର ବିରୋଧରେ ଲଢେଇ ପାଇଁ ଜଣାଶୁଣା। ଏହି ବେଙ୍ଗଲକୁ ଦେଖି ମୋତେ ଖୁସି ଲାଗୁଛି, ଯିଏ ବର୍ତ୍ତମାନର ଶାସନର ଅତ୍ୟାଚାର ଏବଂ ଦୁର୍ନୀତି ବିରୋଧରେ ଜାଗ୍ରତ ହୋଇଉଠିଛି। ଏକ ଜନ ଆନ୍ଦୋଳନ ଆରମ୍ଭ ହୋଇଛି। ଏହା ଏକ ସ୍ୱତଃ ପ୍ରବୃତ୍ତ ଜନ ଆନ୍ଦୋଳନ।’’
