ବନ୍ଧା ହେଲେ ନବରଙ୍ଗପୁର ଉପ-ଜିଲ୍ଲାପାଳ, ୫ କୋଟିରୁ ଉର୍ଦ୍ଧ ଆୟ ବର୍ହିଭୂତ ସମ୍ପତ୍ତି ଠାବ …
1 min read
ଭୁବନେଶ୍ୱର : ଗିରଫ୍ ହେଲେ ନବରଙ୍ଗପୁର ଅତିରିକ୍ତ ଉପଜିଲ୍ଲାପାଳ ପ୍ରଶାନ୍ତ ରାଉତ । ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ବାନ୍ଧିଲା ଭିଜିଲାନ୍ସ । ଗତକାଲି ପ୍ରଶାନ୍ତଙ୍କ ଘର ସମେତ ୯ଟି ସ୍ଥାନରେ ରେଡ୍ ପକାଇଥିଲା ଭିଜିଲାନ୍ସ । ତେବେ ପ୍ରଶାନ୍ତଙ୍କ ନବରଙ୍ଗପୁର ସରକାରୀ ବାସଭବନ, କାର୍ଯ୍ୟାଳୟ, ଭଦ୍ରକ ସ୍ଥିତ ପୈତୃକ ଘର, ଭୁବନେଶ୍ୱର ସ୍ଥିତ କାନନ ବିହାର ଘରେ ଚଢାଉ ଜାରି ରହିଥିଲା ।
ସେହିଭଳି ଭୁବନେଶ୍ୱର କାନନ ବିହାର ଘରୁ ନଗଦ ୩ କୋଟି ୨ ଲକ୍ଷ ଟଙ୍କା ଜବତ ହେବା ପରେ, ଖୋଳତାଡ ଆରମ୍ଭ କରିଛି ଭିଜିଲାନ୍ସ । ଖବର ଅନୁଯାୟୀ ପ୍ରଶାନ୍ତଙ୍କ ନାଁରେ ୨ ଟି ବେନାମୀ କାର ରହିଛି ଯାହାର ମୂଲ୍ୟ ପାଖିପାଖି ୩୦ ଲକ୍ଷ ଟଙ୍କା ହେବ । ଏହା ସହ ଘରେ ଏକ ବହି ର୍ୟାକ୍ ପଛପଟେ କାନ୍ଥରେ ଲୁଚାଇ ରଖଥିବା ୧୦ ଲକ୍ଷ ଟଙ୍କା ମଧ୍ୟ ଜବତ କରାଯାଇଛି । ଚୋରି ଟଙ୍କାକୁ ଲୁଚାଇବାକୁ ଯାଇ ପେଟି ଭିତରେ ଥିବା ୨ କୋଟି ନଗଦ ଟଙ୍କାକୁ ପଡୋଶୀ ଘରର ଛାତ ଉପରକୁ ଫୋପାଡି ଦେଇଥିଲେ ପ୍ରଶାନ୍ତ ।
ପଡ଼ୋଶୀଙ୍କ ବେଡ୍ ରୁମରୁ ଟଙ୍କା ଭର୍ତ୍ତି ୬ଟି ପେଟି ଏବଂ ଗୋଟିଏ ବ୍ରିଫକେସ୍ ଜବତ କରିଥିଲା ଭିଜିଲାନ୍ସ । ତାଙ୍କର ଏକ ବେନାମୀ ଆକାଉଣ୍ଟ ମଧ୍ୟ ରହିଛି ଯେଉଁଥିରେ ୨୦୧୯ ରୁ ପ୍ରାୟ ୨୧ ଲକ୍ଷ ଟଙ୍କା ରହିଛି ।ଏ ଆକାଉଣ୍ଟରୁ ହିଁ ସବୁ ଟଙ୍କା ଲେଣଦେଣ ହୁଏ । ଏନେଇ ଭିଜିଲାନ୍ସ ଏସପି ଏକ ପ୍ରେସମିଟ୍ରେ ସୂଚନା ଦେଇଛନ୍ତି ।
