ଯାତ୍ରୀଙ୍କୁ ନେଇ କଲିକତାରୁ ଯାଉଥିଲା ପୁରୀ, ରାସ୍ତା କଡରେ ଛିଡା ହୋଇଥିବା ଟ୍ରକକୁ ପଛରୁ ପିଟି ଦେଲା ବସ..
1 min read
ବାଲେଶ୍ୱର : ବାଲେଶ୍ୱରରେ ଘଟିଲା ଦୁର୍ଘଟଣା । ଅଧାରେ ରହିଗଲା ଜଗା ଦର୍ଶନ । ଟ୍ରକକୁ ପଛପଟୁ ଧକ୍କା ଦେଲା ତୀର୍ଥଯାତ୍ରୀ ବସ । ସୋର ଥାନା ୧୬ ନମ୍ବର ଜାତୀୟ ରାଜପଥ ତଳନଗର ନିକଟରେ ଘଟିଛି ଏହି ଦୁର୍ଘଟଣା । ତେବେ ଏକ ତୀର୍ଥ ଯାତ୍ରୀ ବସ ଆଗରେ ଛିଡା ହୋଇଥିବା ଏକ ଟ୍ରକକୁ ଧକ୍କା ଦେବା ଫଳରେ ୨୧ ଜଣ ଯାତ୍ରୀ ସାମାନ୍ୟ ଆହତ ହୋଇଛନ୍ତି । ସୂଚନା ଅନୁସାରେ ଗତ ସେପ୍ଟେମ୍ବର ୨୭ ତାରିଖରେ ନେପାଳ ବାଙ୍କେ ଜିଲାରୁ ୟୁପି ୩୨ପିଏନ ୭୬୧୬ ନମ୍ବର ବିଶିଷ୍ଟ ଏକ ବସରେ ୬୧ ଜଣ ତୀର୍ଥ ଯାତ୍ରାରେ ବାହାରିଥିଲେ । କଲିକତାରୁ ପୁରୀ ଅଭିମୁଖେ ଯାଉଥିବା ବେଳେ ଆଜି ସକାଳେ ସୋର ଥାନା ୧୬ ନମ୍ବର ଜାତୀୟ ରାଜପଥ ତଳନଗର ନିକଟସ୍ଥ ମନୋରଞ୍ଜନ ଢ଼ାବା ସମ୍ମୁଖରେ ଛିଡା ହୋଇଥିବା ଏକ ଟ୍ରକ କୁ ପଛପଟୁ ବସଟି ଧକ୍କା ଦେଇଥିଲା । ଫଳରେ ବସରେ ଥିବା ୬୧ ଜଣଙ୍କ ମଧ୍ୟରୁ ୨୦ ଜଣ ସାମାନ୍ୟ ଆହତ ହୋଇଥିବା ବେଳେ ଜଣଙ୍କର ଅବସ୍ଥା ଗୁରୁତର ରହିଛି । ସ୍ଥାନୀୟ ଲୋକେ ସମସ୍ତ ଆହତଙ୍କୁ ଉଦ୍ଧାର କରି ସୋର ଡାକ୍ତରଖାନାକୁ ଆଣିଥିଲେ । ୨୦ ଜଣ ସାମାନ୍ୟ ଆହତଙ୍କୁ ଚିକିତ୍ସିତ କରାଯାଇଥିବା ବେଳେ ବସ ଡ୍ରାଇଭର ରାଜୁ ଗୁପ୍ତା ଗୁରୁତର ଆହତ ହୋଇଥିବାରୁ ତାଙ୍କୁ ବାଲେଶ୍ୱର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ।ତେବେ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ଜଣା ପଡିଛି ।
