IPL ରେ ନଜର ଆସିବେ ଋଷବ ପନ୍ତ ! ଦିଲ୍ଲୀ କୋଚ୍ଙ୍କ ବଡ ବୟାନ୍ ..
1 min read
ନୂଆଦିଲ୍ଲୀ : ଋଷବ ପନ୍ତଙ୍କୁ ନେଇ ଭାବୁକ ହେଲେ ପଟିଂ । ଦିଲ୍ଲୀ କୋଚ୍ ରିକି ପଂଟିଂଙ୍କ ବଡ ବୟାନ । କହିଲେ, ଆଇପିଏଲ୍ରେ ନଜର ଆସିବେ ଋଷଭ ପନ୍ତ । ଦୁର୍ଘଟଣାରେ ଆହତ ହେବା ପରେ ଚିକିତ୍ସିତ ହେଉଛନ୍ତି ଟିମ୍ ଇଣ୍ଡିଆ ଉଇକେଟକିପର ବ୍ୟାଟ୍ସ ମ୍ୟାନ୍ ଋଷଭ ପନ୍ତ । ନିକଟରେ କୋକିଲାବେନ ହସ୍ପିଟାଲରେ ପନ୍ତଙ୍କ ସର୍ଜରୀ ଶେଷ ହୋଇଛି । ତାଙ୍କର ଅସୁସ୍ଥତାକୁ ନେଇ ଦିଲ୍ଲୀ କ୍ୟାପିଟାଲ୍ସ ଲାଗି ନୂଆ ଅଧିନାୟକ ଖୋଜିବାକୁ ହେବ ବୋଲି କୁହାଯାଉଛି । ହେଲେ ଏସବୁ ମଧ୍ୟରେ ଦିଲ୍ଲୀ ମୁଖ୍ୟ କୋଚ୍ ରିକି ପଟିଂ ପନ୍ତଙ୍କୁ ନେଇ ବଡ଼ ବୟାନ ଦେଇଛନ୍ତି ।
ପନ୍ତ ଆଇପିଏଲ୍ ୨୦୨୩ରେ ଖେଳିବା ଲାଗି ଫିଟ୍ ନ ହେଲେ ବି ତାଙ୍କୁ ଡଗ୍ଆଉଟ୍ରେ ସେ ଦେଖିବାକୁ ଚାହିଁବେ ବୋଲି ପଟିଂ କହିଛନ୍ତି । ଆଇସିସି ରିଭ୍ୟୁରେ ପଂଟିଂ କହିଛନ୍ତି, ପନ୍ତଙ୍କ ଭଳି ଖେଳାଳି ଗଛରେ ଫଳନ୍ତି ନାହିଁ । ଏଣୁ କେହି ତାଙ୍କ ସ୍ଥାନ ନେଇପାରିବେ ନାହିଁ । ଆମେ ତାଙ୍କ ବଦଳ ବିଷୟରେ ଚିନ୍ତା କରୁଛୁ । ଆମକୁ ଜଣେ ଉଇକେଟକିପର ବ୍ୟାଟ୍ସମ୍ୟାନ୍ର ଆବଶ୍ୟକତା ରହିଛି । ଯଦି ସେ ଖେଳିବାକୁ ସମ୍ପୂର୍ଣ୍ଣ ଭାବେ ଫିଟ୍ ନ ହୁଅନ୍ତି, ତେବେ ଆମକୁ ଦ୍ୱିତୀୟ ଅଧିନାୟକର ଆବଶ୍ୟକତା ପଡ଼ିପାରେ । ହେଲେ ଯଦି ସେ ବାସ୍ତବରେ ଖେଳିବାକୁ ଶାରୀରିକ ଭାବେ ଫିଟ୍ ନ ହୁଅନ୍ତି ତେବେ ବି ଆମେ ତାଙ୍କୁ ଡଗ୍ଆଉଟ୍ରେ ଆମ ସହ ଦେଖିବାକୁ ପସନ୍ଦ କରିବୁ ବୋଲି ସେ କହିଛନ୍ତି ।
ଦିଲ୍ଲୀ କ୍ୟାପିଟାଲ ଲାଗି ସେ ଜଣେ ଚମତ୍କାର ଲିଡର । ଅଧିନାୟକ ହେବା ସହ ତାଙ୍କ ବ୍ୟବହାର ଏବଂ ହସକୁ ଆମେ ବହୁତ ପସନ୍ଦ କରୁ । ଯଦି ସେ ଯାତ୍ରା କରିବା ଏବଂ ଦଳ ଆଖପାଖରେ ରହିବାକୁ ସକ୍ଷମ ହେବେ ତେବେ ମୁଁ ଚାହିଁବି ଯେ ସେ ସପ୍ତାହର ୭ ଦିନ ଡଗ୍ଆଉଟ୍ରେ ମୋ’ ପାଖେ ବସନ୍ତୁ । ମାର୍ଚ୍ଚ ଅଧା ଆଡକୁ ଆମେ ଦିଲ୍ଲୀରେ ଭେଟ ହେବୁ ବୋଲି ସୁନିଶ୍ଚିତ କରୁଛି । ସେ ଆମ କ୍ୟାମ୍ପରେ ରହିବାକୁ ସକ୍ଷମ ହେଲେ, ମୁଁ ତାଙ୍କୁ ସାଙ୍ଗରେ ରଖିବି ବୋଲି ପଂଟିଂ କହିଛନ୍ତି ।
