ବିଶ୍ୱକପ ହାରିବା ପରେ କାନ୍ଦୁଥିଲେ ରୋହିତ, ବୁଝାଇଲା ଅମୁଲ ଗାର୍ଲ…
1 min read
ଷଷ୍ଠ ଥର ପାଇଁ ବିଶ୍ୱ ଚାମ୍ପିୟନ୍ ହୋଇଗଲା କଙ୍ଗାରୁ ଟିମ୍ । ଅଧୁରା ରହିଗଲା ୩ୟ ବିଶ୍ୱକପ୍ ସ୍ୱପ୍ନ । ବିଜୟର ପାଖରୁ ଯାଇ ପରାଜୟର ସ୍ୱାଦ ଚାଖିଲା ଭାରତ । ନିରାଶ ଦେଶବାସୀ, ଆଉ ଧୈାର୍ଯ୍ୟହରା ହେଲେ କ୍ରିକେଟର । ଭାରତ ଦେଇଥିବା ୨୪୧ ରନ୍ର ଟାର୍ଗେଟ୍କୁ ୪୩ ଓଭରେ ମାତ୍ର ୩ ୱିକେଟ୍ ହରାଇ ହାସଲ କରିନେଇଥିଲା ଅଷ୍ଟ୍ରେଲିଆ । ଭାରତୀ ପରାଜୟ ପରେ ଦୁଃଖରେ ଭାଙ୍ଗି ପଡିଥିଲେ ପ୍ରଶଂସକମାନଙ୍କ ଠାରୁ ଖେଳାଳି ପର୍ଯ୍ୟନ୍ତ । ଆଉ ଛଳଛଳ ହୋଇଯାଇଥିଲା ଅଧିନାୟକ ରୋହିତ ଶର୍ମା ଏବଂ ବିରାଟ କୋହଲିଙ୍କ ଆଖି । ତେବେ ଆଜି ସେହି ପରାଜୟର ଦୁଃଖରୁ ବାହାରି ପାରିନାହାନ୍ତି ଆମ ଭାରତୀୟ କ୍ରିକେଟର । ଆଉ ଏହି ସମୟରେ ଭାରତୀୟ ଦଳକୁ ସାହସ ଯୋଗାଇଛି ଅମୁଲ କମ୍ପାନୀ । ସ୍ପେଶାଲ ଅନ୍ଦାଜରେ ଟିମ ଇଣ୍ଡିଆକୁ ଆଶ୍ୱାସନା ଦେଇଛି ଅମୁଲ । ଅମୁଲ କମ୍ପାନୀ ତରଫରୁ ସୋସିଆଲ ମିଡିଆରେ ଏକ ପୋଷ୍ଟ କରାଯାଇଛି । ଏହି ପୋଷ୍ଟରେ ଟିମ ଇଣ୍ଡିଆ ଜର୍ସିରେ ଜଣେ ଖେଳାଳିଙ୍କୁ ଦର୍ଶାଯାଇଛି । ସେହି ଖେଳାଳିଜଣକ ଖୁବ ନିରାଶ ଏବଂ ଦୁଃଖିତ ହୋଇ ବସି ରହିଥିବା ବେଳେ ତାଙ୍କ ପାଖରେ ବସିଛନ୍ତି ଅମୁଲ ଗାର୍ଲ । ତେବେ ଏହି ଚିତ୍ରରେ ଥିବା ଖେଳାଳି ରୋହିତ ଶର୍ମା ବୋଲି ଜଣାପଡୁଛି । ତେବେ ଅମୁଲ ଗାର୍ଲ ରୋହିତଙ୍କ ହାତ ଉପରେ ହାତ ରଖି ତାଙ୍କୁ ସମବେଦନା ଜଣାଉଥିବା ଦେଖିବାକୁ ମିଳିଛି ।
