ନିର୍ବାଚନ ପୂର୍ବରୁ ଆପକୁ ଝଟକା; ଦଳ ଛାଡିଲେ କୈଳାଶ ଗେହଲଟ୍‌

ଦିଲ୍ଲୀ ବିଧାସଭା ନିର୍ବାଚନ ପୂର୍ବରୁ ଆମ ଆଦମୀଙ୍କୁ ଲାଗିଛି ବଡ ଝଟକା | ଦିଲ୍ଲୀ ସରକାରର ପରିବହନ ମନ୍ତ୍ରୀ କୈଳାଶ ଗେହଲଟ ନିଜ ମନ୍ତ୍ରୀ ପଦରୁ ଦେଇଛନ୍ତି ଇସ୍ତଫା | କେବଳ ସେତିକି ନୁହେଁ ଆପର ପ୍ରାଥମିକ ସଦସ୍ୟତା ମଧ୍ୟ ଛାଡିଛନ୍ତି | ଦିଲ୍ଲୀ ମୁଖ୍ୟମନ୍ତ୍ରୀ ଆତିଶିଙ୍କ ନିକଟରେ କୈଳାଶ ଗେହଲଟ ତାଙ୍କ ଇସ୍ତଫା ପଠାଇଛନ୍ତି | ଏହାସହ ମୁଖ୍ୟମନ୍ତ୍ରୀ ମଧ୍ୟ ଇସ୍ତଫା ଗ୍ରହଣ କରିଛନ୍ତି |

ପରିବହନ ମନ୍ତ୍ରୀ କୈଳାଶ ଗେହଲଟ ତାଙ୍କ ମନ୍ତ୍ରୀ ପଦରୁ ଇସ୍ତଫା ଦେବା ସହିତ ‘ଏଏପି’ର ପ୍ରାଥମିକ ସଦସ୍ୟତାରୁ ମଧ୍ୟ ଇସ୍ତଫା ଦେଇଛନ୍ତି। ଗେହଲୋଟ ଚିଠିରେ ଅଭିଯୋଗ କରିଛନ୍ତି ଯେ ଯେଉଁ କାରଣରୁ ସେ ଆମ୍ ଆଦମୀ ପାର୍ଟିକୁ ଆସିଥିଲେ, ତାହା ଆଉ ଘଟୁନାହିଁ। ଏଥିସହ ସେ ପାର୍ଟି ଅଭିଯୋଗକାରୀ ତଥା ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସରକାରୀ ବାସଭବନକୁ ‘ଶିସ୍‌ମହଲ’ ବୋଲି କହି ଅନେକ ଅଭିଯୋଗ କରିଛନ୍ତି।

କୈଳାଶ ଗେହଲଟ୍ ଚିଠିରେ ଲେଖିଛନ୍ତି, ‘ଶିସ୍‌ମହଲ ପରି ଅନେକ ଲଜ୍ଜାଜନକ ଏବଂ ଅଜବ ବିବାଦ ରହିଛି, ଯାହା ସନ୍ଦେହ ସୃଷ୍ଟି କରୁଛି କି ଆମେ କ’ଣ ଏବେ ବି ଆମ ଆଦମୀ ହୋଇ ଅଛେ? ବର୍ତ୍ତମାନ ଏହା ସ୍ପଷ୍ଟ ହୋଇଛି ଯେ ଯଦି ଦିଲ୍ଲୀ ସରକାର ଏହାର ଅଧିକାଂଶ ସମୟ କେନ୍ଦ୍ର ସହ ଲଢେଇ କରିବାରେ ଖର୍ଚ୍ଚ କରିବେ, ତେବେ ଦିଲ୍ଲୀର କୌଣସି ପ୍ରଗତି ହୋଇପାରିବ ନାହିଁ, ମୋ ପାଖରେ ଆପ୍‌ ଠାରୁ ଅଲଗା ହେବା ବ୍ୟତୀତ ଅନ୍ୟ କୌଣସି ବିକଳ୍ପ ନାହିଁ। ତେଣୁ ମୁଁ ଆମ୍ ଆଦମୀ ପାର୍ଟିର ପ୍ରାଥମିକ ସଦସ୍ୟତାରୁ ଇସ୍ତଫା ଦେଉଛି।’

ସୋସିଆଲ ମିଡିଆ ପ୍ଲାଟଫର୍ମ ଏକ୍ସ ମାଧ୍ୟମରେ କୈଳାଶ ଗେହଲଟ ତାଙ୍କ ଇସ୍ତଫା ବିଷୟରେ ସୂଚନା ଦେଇଛନ୍ତି। ଏଥିସହ ଆମ୍‌ ଆଦମୀ ପାର୍ଟି ଓ ଅରବିନ୍ଦ କେଜ୍ରିଓ୍ୱାଲଙ୍କ ବିରୋଧରେ ସେ ବଡ଼ ଅଭିଯୋଗ ଆଣିଛନ୍ତି। ଲୋକମାନଙ୍କୁ ଦିଆଯାଇଥିବା ପ୍ରତିଶ୍ରୁତି ପୂରଣ ନକରିବାରୁ ସେ ଇସ୍ତଫା ଦେଇଥିବା ନେଇ କାରଣ ଦର୍ଶାଇଛନ୍ତି।

ତେବେ ଆସନ୍ତା ବର୍ଷ ଫେବ୍ରୁଆରୀରେ ରାଜଧାନୀ ଦିଲ୍ଲୀରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ଏଭଳି ସ୍ଥିତିରେ କୈଳାଶ ଗେହଲଟଙ୍କ ଇସ୍ତଫା ଦଳ ପାଇଁ ପଡିପାରେ ମହଙ୍ଗା ।