ଡ୍ରଗ୍ସ ଜାଲରେ ଆଉ ଜଣେ ଷ୍ଟାର କିଡ୍: ପୋଲିସ୍ ହେପାଜତରେ ଶ୍ରଦ୍ଧା କପୁରଙ୍କ ଭାଇ
1 min read
ବଲିଉଡ୍ ଡ୍ରଗ୍ସ ମାମଲାରେ ଅନେକ ସେଲିବ୍ରେଟିଙ୍କ ନାମ ସାମ୍ନାକୁ ଆସିଥିଲା। ଅନେକ ସେଲିବ୍ରେଟଙ୍କୁ ପଚରାଉଚରା ମଧ୍ୟ କରାଯାଇଥିଲା। ବର୍ତ୍ତମାନ ଏହି ଲିଷ୍ଟରେ ଆଉ ଏକ ନାମ ସାମିଲ ହୋଇଛି। ବଲିଉଡ ଅଭିନେତା ଶକ୍ତି କପୁରଙ୍କ ପୁଅ ସିଦ୍ଧାନ୍ତ କପୁର ଡ୍ରଗ୍ସ ମାମଲାର ଏକ ଅଂଶ ପାଲଟିଛନ୍ତି। ନିଶା ସେବନ ପାଇଁ ସିଦ୍ଧାନ୍ତଙ୍କୁ ପୋଲିସ୍ ଗିରଫ କରିଛି। ବେଙ୍ଗାଲୁରୁ ପୋଲିସ ରବିବାର ଦିନ ହଠାତ୍ ଏକ ପାଞ୍ଚ ତାରକା ହୋଟେଲ ଉପରେ ଚଢାଉ କରିଥିଲା।
ଯେଉଁଥିରେ ସିଦ୍ଧାର୍ଥଙ୍କୁ ଗିରଫ କରାଯାଇଛି। ପରେ ସିଦ୍ଧାନ୍ତଙ୍କ ଡ୍ରଗ୍ସ ଟେଷ୍ଟ ନିଆଯାଇଥିଲା ଯାହା ପଜିଟିଭ୍ ଆସିଥିଲା। ସିଦ୍ଧାନ୍ତଙ୍କ ନାମ ସେହି ୬ଜଣଙ୍କ ମଧ୍ୟରେ ସାମିଲ୍ ହୋଇଛି। ଡ୍ରଗ୍ସ ମାମଲାରେ ସିଦ୍ଧାନ୍ତଙ୍କ ନାମ ଆସିବା ପରେ ଶକ୍ତି କପୁର ନିଜର ପ୍ରତିକ୍ରିୟା ପ୍ରକାଶ କରିଛନ୍ତି। ମିଡିଆ ରିପୋର୍ଟ ଅନୁଯାୟୀ ଏହି ମାମଲାରେ ଯେତେବେଳେ ଶକ୍ତି କପୁରଙ୍କୁ ପଚରାଯାଇଥିଲା ସେତେବେଳେ ଶକ୍ତି କପୁର କହିଛନ୍ତି ଯେ ମୁଁ କେବଳ ଗୋଟିଏ କଥା କହିପାରେ, କି ଏହା ସମ୍ଭବ ନୁହେଁ।କାରଣ ମୁଁ ମୁମ୍ବାଇରେ ଅଛି, ଏବିଷୟରେ ମୋତେ ଜଣା ନାହିଁ, ମୁଁ ନ୍ୟୁଜ୍ ଚ୍ୟାନେଲରୁ ହିଁ ଜାଣିଲି। ଏସବୁ କ’ଣ ଘଟୁଛି ଜାଣି ନାହିଁ ।
ଏଥିରେ ସିଦ୍ଧାନ୍ତଙ୍କୁ କେବଳ ହେପାଜତକୁ ନିଆଯାଇଛି । ତାଙ୍କୁ ଗିରଫ କରାଯାଇ ନାହିଁ ବୋଲି କହିଛନ୍ତି। ରବିବାର ରାତିରେ ବେଙ୍ଗାଲୁରୁ ପୋଲିସ ଏକ ଫାଇଭ୍ ଷ୍ଟାର ହୋଟେଲ ଉପରେ ଚଢାଉ କରିଥିଲା। ଯେଉଁଠାରେ ହାଇ ପ୍ରୋଫାଇଲ୍ ଡ୍ରଗ୍ସ ପାର୍ଟି ଚାଲିଥିଲା । ଏହି ପାର୍ଟିରେ ୩୫ ଜଣଙ୍କର ବ୍ଲଡ୍ ସାମ୍ପଲ୍ ନିଆଯାଇଥିଲା, ଯେଉଁଥିରୁ ୫ ଜଣଙ୍କର ପଜିଟିଭ୍ ଆସିଛି। ସେହି ପାଞ୍ଚ ଜଣଙ୍କ ସହ ସିଦ୍ଧାନ୍ତଙ୍କୁ ଅଟକ ରଖାଯାଇଛି। ସିଦ୍ଧାନ୍ତ କପୁରଙ୍କ ଟେଷ୍ଟ ମଧ୍ୟ ପଜିଟିଭ୍ ଆସିଛି। ରାତି ୧୨ ଟା ସମୟରେ ଉଲସୁର ପୋଲିସ ହୋଟେଲ ଉପରେ ଚଢାଉ କରିଥିଲା। ଏହି ଚଢାଉରେ ୫୦ ରୁ ଅଧିକ ଯୁବକ-ଯୁବତୀଙ୍କୁ ଗିରଫ କରାଯାଇ ଡାକ୍ତରୀ ପରୀକ୍ଷା ପାଇଁ ପଠାଯାଇଥିଲା।
