ଏମପି, ରାଜସ୍ଥାନ ଏବଂ ଛତିଶଗଡରେ ବିଜେପି କାହାକୁ ପିନ୍ଧାଇବ ମୁକୁଟ? କିଏ କରିବ ଏହି ୩ରାଜ୍ୟରେ ରାଜ୍..
1 min read
ଡିସେମ୍ବର ୩ ରେ ଚାରିଟି ରାଜ୍ୟରେ ଅନୁଷ୍ଠିତ ବିଧାନସଭା ନିର୍ବାଚନର ଫଳାଫଳ ଘୋଷଣା କରାଯାଇଥିଲା । ଡିସେମ୍ବର ୪ ରେ ମିଜୋରାମର ଫଳାଫଳ ଆସିଥିଲା । ଯେଉଁଥିରେ ୩ଟି ବିଜେପି ଖାତାକୁ ଯାଇଥିବା ବେଳେ ଗୋଟେ ରାଜ୍ୟ କଂଗ୍ରେସ ଖାତାକୁ ଯାଇଛି । ସେହିପରି ଜୋରାମ ପିପୁଲ୍ସ ମୁଭମେଣ୍ଟ (ଜେପିଏମ) ମିରୋଜାମରେ କ୍ଷମତାକୁ ଆସିଥିଲା । ତେବେ ତେଲେଙ୍ଗାନାରେ କଂଗ୍ରେସ ତା ମୁଖ୍ୟମନ୍ତ୍ରୀ ଘୋଷଣା କରି ସାରିଥିବା ବେଳେ ବିଜେପି ଆଜି ପର୍ଯ୍ୟନ୍ତ ତାର ଅଙ୍କ କଷୁଛି । ବର୍ତ୍ତମାନ ପର୍ଯ୍ୟନ୍ତ ବିଜେପି ତାର ୩ରାଜ୍ୟ ପାଇଁ ସିଏମ ପ୍ରାର୍ଥୀ କୁ ସସପେନ୍ସରେ ରଖିଛି । ତେବେ ମଧ୍ୟପ୍ରଦେଶ, ରାଜସ୍ଥାନ ଓ ଛତିଶଗଡ଼ରେ କିଏ ହେବ ବିଜେପିର ମୁଖ୍ୟମନ୍ତ୍ରୀ ? ଦୂର ହେବ କି ସସପେନ୍ସ । ତେଲେଙ୍ଗାନା ଏବଂ ମିରୋଜାମରେ ମଧ୍ୟ ନୂତନ ସରକାର ଗଠନ କରାଯାଇଥିଲା ।
କିନ୍ତୁ ୩ ରାଜ୍ୟଗୁଡିକରେ ମୁଖ୍ୟମନ୍ତ୍ରୀଙ୍କ ବିଷୟରେ ଏକ ଦ୍ୱନ୍ଦ୍ୱ ରହିଛି । ଛଅ ଦିନ ବିତିଯାଇଥିଲେ ମଧ୍ୟ ମଧ୍ୟପ୍ରଦେଶ, ରାଜସ୍ଥାନ ଏବଂ ଛତିଶଗଡର ମୁଖ୍ୟମନ୍ତ୍ରୀ କିଏ ହେବେ ସେନେଇ କୌଣସି ସୂଚନା ନାହିଁ । ତେବେ ଶୁଣିବାକୁ ମିଳିଛି ଯେ ଆଜି ଘୋଷଣା ହୋଇପାରେ ନୂଆ ସିଏମଙ୍କ ନାଁ । ଆସନ୍ତାକାଲି ହୋଇପାରେ ଶପଥ ଗ୍ରହଣ । ବିଜେପି ନେତା ବାଛିବାରେ ବିଳମ୍ବ କରୁଥିବା ବେଳେ କିଛି ନୂଆ ଖବର ସାମ୍ନାକୁ ଆସିବା ନେଇ ଆଶା କରାଯାଉଛି । ଏହାର ଅର୍ଥ ହେଉଛି ବିଜେପି ଏକ ନୂଆ ଚେହେରା ଉପରେ ବାଜି ଲଗାଇପାରେ । ସମସ୍ତ ତିନୋଟି ରାଜ୍ୟରେ ମୁଖ୍ୟମନ୍ତ୍ରୀ ପଦ ପାଇଁ ଅନେକ ପ୍ରତିଯୋଗୀ ଅଛନ୍ତି । ବିଜେପି ଏକ ନୂଆ ଚେହେରା କରିବାକୁ ଚାହୁଁଛି ।
ସାଂସଦ ଶିବରାଜ ସିଂଙ୍କ ବ୍ୟତୀତ ନରେନ୍ଦ୍ର ସିଂ ତୋମାର, ପ୍ରହ୍ଲାଦ ସିଂ ପଟେଲଙ୍କ ଭଳି ନେତାମାନେ ସିଏମ୍ ପଦବୀ ପାଇଁ ଦୌଡ଼ରେ ଅଛନ୍ତି । ଏହା ବ୍ୟତୀତ ଜ୍ୟୋତିରାଦିତ୍ୟ ସିନ୍ଧ୍ୟା ନାମ ମଧ୍ୟ ନିଆଯାଉଛି । ଯଦି ରାଜସ୍ଥାନ ବିଷୟରେ କଥା ହେବା, ବସୁନ୍ଧରା ବ୍ୟତୀତ ଅର୍ଜୁମ ରାମ ମେଘୱାଲ, ଦିୟା କୁମାରୀ, ବାବା ବାଲକନାଥ ସିଏମ ପଦବୀ ପାଇଁ ଦୌଡ଼ରେ ଅଛନ୍ତି । ଅନ୍ୟପକ୍ଷରେ ଛତିଶଗଡରେ ରମଣ ସିଂଙ୍କ ବ୍ୟତୀତ ଅରୁଣ ସାଓ, ରେଣୁକା ସିଂ ଏବଂ ଓପି ଚୌଧୁରୀଙ୍କ ଭଳି ନେତାଙ୍କ ନାମ ସାମ୍ନାକୁ ଆସୁଛି । ଏଭଳି ପରିସ୍ଥିତିରେ ତିନି ରାଜ୍ୟ ପାଇଁ ନିଯୁକ୍ତ ପର୍ଯ୍ୟବେକ୍ଷକଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଅଟେ ।
