ନ୍ୟାୟ ଯାତ୍ରାରେ ରାହୁଲଙ୍କ ରଥର ସାରଥୀ ସାଜିଲେ ତେଜସ୍ୱୀ..

ରାହୁଲ ବସିଲେ କାର୍ ଚଳାଇଲେ ତେଜସ୍ୱୀ । ନ୍ୟାୟ ଯାତ୍ରାରେ ରାହୁଲଙ୍କ ଷ୍ଟିୟରିଂ ସମ୍ଭାଳିଲେ ତେଜସ୍ୱୀ ଯାଦବ । ବରିଷ୍ଠ କଂଗ୍ରେସ ନେତା ରାହୁଲ ଗାନ୍ଧୀଙ୍କ ‘‘ଭାରତ ଯୋଡ଼ୋ ନ୍ୟାୟ ଯାତ୍ରା’’ ରୋହତାସ(ସାସାରାମ)ରେ ପହଞ୍ଚିସାରିଛି । ଶୁକ୍ରବାର ଆରଜେଡି ସୁପ୍ରିମୋ ଲାଲୁ ପ୍ରସାଦଙ୍କ ପୁଅ ତଥା ପୂର୍ବତନ ଉପମୁଖ୍ୟମନ୍ତ୍ରୀ ତେଜସ୍ୱୀ ଯାଦବ ରୋହତାସରେ ପହଞ୍ଚିଛନ୍ତି । ତେଜସ୍ୱୀ ଯାଦବ କେବଳ ରାହୁଲ ଗାନ୍ଧୀଙ୍କ ଯାତ୍ରାରେ ସାମିଲ ହୋଇନାହାନ୍ତି ବରଂ ତାଙ୍କର ସାରଥୀ ମଧ୍ୟ ସାଜିଛନ୍ତି । ତେଜସ୍ୱୀ ଯାଦବ ରାହୁଲ ଗାନ୍ଧୀଙ୍କ ସହ ଏକ ଲାଲ ଚାରି ଚକିଆ ଯାନରେ ଇଣ୍ଡିଆ ମେଣ୍ଟର ହଜାର ହଜାର କର୍ମୀ ଏବଂ ସମର୍ଥକଙ୍କ ସହ ନଜର ଆସିଥିଲେ । କଂଗ୍ରେସର ବରିଷ୍ଠ ନେତ୍ରୀ ମୀରା କୁମାରଙ୍କୁ ମଧ୍ୟ କାରର ପଛ ସିଟରେ ଦେଖିବାକୁ ମିଳିଥିଲା ।

‘‘ଭାରତ ଯୋଡ଼ୋ ନ୍ୟାୟ ଯାତ୍ରା’’ରେ ଆଜି ହେଉଛି ୩୪ତମ ଦିନ । ରାହୁଲ ଗାନ୍ଧି ଆଜି ରୋହତାସର କୃଷକ ନେତାଙ୍କ ସହ କଥା ହେବେ । ଦିନ ପ୍ରାୟ ୨ଟା ୩୦ ସମୟରେ ତେଜସ୍ୱୀ ଯାଦବ ଏବଂ ରାହୁଲ ଗାନ୍ଧୀ କୈମୁରରେ ଏକ ସଭାକୁ ସମ୍ବୋଧିତ କରିବେ ଏବଂ ସନ୍ଧ୍ୟା ପ୍ରାୟ ୫ଟାରେ ଯାତ୍ରା ଉତ୍ତରପ୍ରଦେଶରେ ପ୍ରବେଶ କରିବ । ବର୍ତ୍ତମାନ ବିହାରରେ ତେଜସ୍ୱୀ ଯାଦବ ଗ୍ରାଣ୍ଡ ଆଲାଇନ୍ସର ନେତା କିମ୍ବା ଭାରତ ଆଲାଇନ୍ସର ନେତା ଅଟନ୍ତି । ବିହାରରେ କଂଗ୍ରେସ ସବୁବେଳେ ମେଣ୍ଟରେ ସାନ ଭାଇର ଭୂମିକା ନିର୍ବାହ କରିଛି । ଏଭଳି ପରିସ୍ଥିତିରେ ଆଜି ରାହୁଲ ଗାନ୍ଧୀଙ୍କ କାରର ଡ୍ରାଇଭିଂ ସିଟ୍ ନେଇ ତେଜସ୍ୱୀ ଯାଦବ ବିହାରରେ ମିଳିତ ମଞ୍ଚର ଡ୍ରାଇଭିଂ ସିଟରେ ଅଛନ୍ତି ବୋଲି ସୂଚାଇ ଦେଇଛନ୍ତି ।