ରାଜନୀତି କରିବେ ରାଜ୍ୟପାଳ , ଲଢ଼ିବେ ଝାଡ଼ଖଣ୍ଡ ବିଧାନସଭା ନିର୍ବାଚନ !
1 min read
ଏବେ ପ୍ରତ୍ୟକ୍ଷ ରାଜନୀତିକୁ ଫେରିବେ ଓଡ଼ିଶା ରାଜ୍ୟପାଳ ରଘୁବର ଦାସ। ଏ ସମ୍ପର୍କରେ ଏବେ ରାଜନୀତି ମହଲରେ କଳ୍ପନାଜଳ୍ପନା ଚାଲିଛି। ଯାହାକୁ ନେଇ ଗତ କିଛିଦିନ ହେଲା ଚର୍ଚ୍ଚା ଜୋର ଧରିଛି । କୁହାଯାଉଛି ଯେ ରାଜ୍ୟପାଳ ପଦରୁ ଇସ୍ତଫା ଦେଇ ଝାଡ଼ଖଣ୍ଡ ବିଧାନସଭା ନିର୍ବାଚନରେ ସେ ପ୍ରତିଦ୍ୱନ୍ଦ୍ୱିତା କରିବେ। କାରଣ ରଘୁବରଙ୍କ ଦିଲ୍ଲୀ ଗସ୍ତ ଏହି ଚର୍ଚ୍ଚାକୁ ଅଧିକ ଖୋରାକ ଯୋଗାଇଛି । ଏହି ଗସ୍ତକୁ ସରକାରୀ ଓ ସେ ଦିଲ୍ଲୀରେ ଦୁଇ କେନ୍ଦ୍ରମନ୍ତ୍ରୀ ଅମିତ୍ ଶାହା ଓ ଜେ.ପି.ନଡ୍ଡାଙ୍କୁ ସାକ୍ଷାତ କରିବେ ବୋଲି କୁହାଯାଉଛି। ତେଣୁ ପ୍ରତ୍ୟକ୍ଷ ରାଜନୀତିକୁ ଫେରିବା ସଂକ୍ରାନ୍ତରେ ଚୂଡ଼ାନ୍ତ ନିଷ୍ପତ୍ତି ଆସନ୍ତାକାଲି ହୋଇପାରେ ବୋଲି କୁହାଯାଉଛି ।
ଦୁଇ ଦିନ ତଳେ ରାଜଭବନରେ ରାଜ୍ୟପାଳ ରଘୁବର ଦାସଙ୍କୁ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ଭେଟିଥିଲେ। ଝାଡ଼ଖଣ୍ଡର ନିର୍ବାଚନର ସହ ପ୍ରଭାରୀ ଶ୍ରୀ ବିଶ୍ୱଶର୍ମା ରଘୁବରଙ୍କୁ ଭେଟି ପ୍ରାୟ ଦୁଇ ଘଣ୍ଟାରୁ ଅଧିକ ସମୟ ଆଲୋଚନା କରିଥିଲେ। ପରେ ସେ ଝାଡ଼ଖଣ୍ଡ ଅଭିମୁଖେ ଗସ୍ତ କରିଥିଲେ। ହିମନ୍ତଙ୍କ ଭେଟ ସହ ରଘୁବର ଦିଲ୍ଲୀ ଗସ୍ତ କରିଥିବାରୁ ଖୁବ୍ଶୀଘ୍ର ତାଙ୍କ ସମ୍ପର୍କରେ ଦଳ ନିଷ୍ପତ୍ତି ନେଇପାରେ ବୋଲି କୁହାଯାଉଛି। ଅନ୍ୟପଟେ ଜାତୀୟ ଗଣମାଧ୍ୟମରେ ହେଉଥିବା ଚର୍ଚ୍ଚା ଅନୁଯାୟୀ ରଘୁବରଙ୍କ ସହ ତାଙ୍କ ରାଜନୈତିକ ଜୀବନରେ କଳାବାଦଲ ଘଟାଇଥିବା ଜେଡିୟୁ ନେତା ସରଯୁୁ ରାୟ ଓ ଜେଡିୟୁ ସୁପ୍ରିମୋ ନୀତୀଶ କୁମାର ମଧ୍ୟ ଦିଲ୍ଲୀ ଗସ୍ତ କରିଥିବା ଜଣାପଡ଼ିଛି। ତେଣୁ ଏହି ୩ ନେତାଙ୍କ ଦିଲ୍ଲୀ ଗସ୍ତ ଉପରେ ଏବେ ରହିଛି ସମସ୍ତଙ୍କ ନଜର । ଗତ ନିର୍ବାଚନରେ ରଘୁବର ଦାସ ଜାମସେଦପୁର-ପୂର୍ବ ଆସନରୁ ପ୍ରତିଦ୍ୱନ୍ଦ୍ୱିତା କରି ସ୍ୱାଧୀନ ପ୍ରାର୍ଥୀ ସରଯୁ ରାୟଙ୍କଠାରୁ ପରାସ୍ତ ହୋଇଥିଲେ। ସରଯୁ ରାୟ ଇତିମଧ୍ୟରେ ନୀତିଶ କୁମାରଙ୍କ ଜେଡିୟୁରେ ଯୋଗଦେଇ ସାରିଥିବାରୁ ରଘୁବରଙ୍କ ପାଇଁ ଅଡ଼ୁଆ ଆହୁରି ବଢ଼ିଛି। କାରଣ ବିଜେପି ଏଠାରେ ଏଜେଏସୟୁ, ଜେଡିୟୁ ଆଦି ଦଳ ଗୁଡିକ ସହ ମେଣ୍ଟରେ ନିର୍ବାଚନ ଲଡ଼ିବାକୁ ଯାଉଛି। ତେଣୁ କେଉଁ ଆସନ କାହା ଭାଗରେ ପଡିବ, ତାହା ଜାଣି ହେଉନାହିଁ। ରଘୁବରଙ୍କ ପାଇଁ ଏହି ଆସନଟି ଜେଡିୟୁ ଛାଡ଼ିବ କି ନାହିଁ ତାହା ଏହି ଗସ୍ତରେ ଆଲୋଚନା ହୋଇପାରେ ବୋଲି ଚର୍ଚ୍ଚା ହେଉଛି। ଯଦିଓ ନିର୍ଦ୍ଧାରିତ ଭାବେ ଏହି ୩ ନେତାଙ୍କ ଗସ୍ତ ଗୋଟିଏ କାରଣ ପାଇଁ କି ନୁହେଁ ସ୍ପଷ୍ଟ ହୋଇ ନାହିଁ, ମାତ୍ର ଏହାକୁ ରାଜନୈତିକ ସମୀକ୍ଷକମାନେ ସଂଯୋଗ ବୋଲି ମନେ କରୁନାହାନ୍ତି।
