ଆମ୍ବୁଲାନ୍ସରେ ଲଜ୍ଜା :ରୋଗୀଣା ସ୍ୱାମୀକୁ ଫୋପାଡ଼ି ସ୍ତ୍ରୀ ସହ କଲେ ଅସଦାଚରଣ ..
1 min read
ଆମ୍ବୁଲାନ୍ସରେ ଲଜ୍ଜା । ଯାହା ଆଜି ସଭ୍ୟ ସମାଜ ମୁଣ୍ଡକୁ ତଳକୁ କରିଦେଇଛି । ଆମ୍ବୁଲାନ୍ସ ରୋଗୀ ପାଇଁ ବରଦାନ ପାଲଟିଥାଏ । ଯଥା ସମୟରେ ରୋଗୀକୁ ମେଡିକାଲ ରେ ପହଞ୍ଚାଇ ରୋଗୀର ଜୀବନ ବଞ୍ଚାଇଥାଏ । ଆମ୍ବୁଲାନ୍ସ ଉପରେ ରୋଗୀଠାରୁ ରୋଗୀର ସମ୍ପର୍କୀୟ ବିଶ୍ୱାସ ଥାଏ । ହେଲେ ସେହି ଆମ୍ବୁଲାନ୍ସ ରେ ନା ରୋଗୀ ସୁରକ୍ଷିତ ନା ତାଙ୍କ ସମ୍ପର୍କୀୟ । ଆଜି ସେହି ଆମ୍ବୁଲାନ୍ସ ଭିତରେ ଏମିତି କିଛି ଘଟଣା ଘଟିଛି ଯାହା ଆଜି ସଭ୍ୟ ସମାଜକୁ ଦୋହଲାଇ ଦେଇଛି । ଚଳନ୍ତା ଆମ୍ବୁଲାନ୍ସରେ ଘଟିଛି ଲଜ୍ଜା। ଜଣେ ମହିଳା ଅସଦାଚରଣର ଶିକାର ହୋଇଛନ୍ତି। କେବଳ ସେତିକି ନୁହେଁ ରୋଗିଣା ସ୍ୱାମୀଙ୍କୁ ବାହାରକୁ ଫିଙ୍ଗି ଦେଇ ମହିଳାଙ୍କୁ ଆମ୍ବୁଲାନ୍ସ କର୍ମଚାରୀ ଅସଦଚରଣ କରିଥିବା ଅଭିଯୋଗ ହୋଇଛି।
ଅଗଷ୍ଟ ୩୦। ଉତ୍ତରପ୍ରଦେଶ ସିଦ୍ଧାର୍ଥନଗର ଜିଲ୍ଲାର ଗୋନହାତଲ ଅଞ୍ଚଳ ରେ ଘଟିଛି ଏପରି ଘଟଣା । ଦୀର୍ଘ ଦିନ ଧରି ସ୍ୱାମୀଙ୍କ ଦେହ ଖରାପ ଥିଲା। ଏଥିଲାଗି ଏଠାକାର ଜଣେ ମହିଳା ଏକ ଘରୋଇ ଆମ୍ବୁଲାନ୍ସରେ ଲକ୍ଷ୍ନୌରୁ ଫେରୁଥିଲେ। ଏହି ସମୟରେ ରାସ୍ତାରେ ତାଙ୍କ ସହ ଆମ୍ବୁଲାନ୍ସ କର୍ମଚାରୀ ଅସଦାଚରଣ କରିଥିଲେ। ଏଥିରେ ଆମ୍ବୁଲାନ୍ସ ଡ୍ରାଇଭର ଓ ତାଙ୍କ ସହାୟକ ସାମିଲ ଥିଲେ।
ପୀଡିତାଙ୍କ ଅଭିଯୋଗ ମୁତାବକ, ଆମ୍ବୁଲାନ୍ସ ଡ୍ରାଇଭର ଜଣକ ତାଙ୍କୁ ପୁଲିସ ଚେକିଂ ଆଳରେ ଅଗ ସିଟ୍ ରେ ବସିବାକୁ ବାଧ୍ୟ କରିଥିଲେ। ସେ ଆଗ ସିଟ୍ ରେ ବସିବା ପରେ ତାଙ୍କ ସହ ଅସଦାଚରଣ କରିଥିଲେ ଡ୍ରାଇଭର। ଏହାପରେ ମହିଳା ଜଣକ ଚିଲ୍ଲେଇବାକୁ ଲାଗିଥିଲେ। ଏହାକୁ ଦେଖି ତାଙ୍କ ରୋଗୀଣା ସ୍ୱାମୀଙ୍କ ମୁହଁରୁ ଅକ୍ସିଜେନ୍ ବାହାର କରି ଦେଇଥିଲେ ଆମ୍ବୁଲାନ୍ସ କର୍ମଚାରୀ। କେବଳ ସେତିକି ନୁହେଁ ଆମ୍ବୁଲାନ୍ସରୁ ତାଙ୍କ ସ୍ୱାମୀଙ୍କୁ ବସ୍ତିଠାରୁ କିଛି ଦୂରରେ ନିଛାଟିଆ ସ୍ଥାନରେ ଫିଙ୍ଗି ଦେଇଥିଲେ। ସାଙ୍ଗରେ ଥିବା ପୀଡିତା ମହିଳାଙ୍କ ଭାଇକୁ ମଧ୍ୟ ଆମ୍ବୁଲାନ୍ସରୁ ଜୋର ଜବରଦସ୍ତି ତଳକୁ ଓହ୍ଲାଇ ଦେଇଥିଲେ। ତାଙ୍କର ଟଙ୍କା ଓ ମୋବାଇଲ ମଧ୍ୟ ଛଡାଇ ନେଇଥିଲେ।
ତାଙ୍କ ଅସୁସ୍ଥ ସ୍ୱାମୀ ଗୁରୁତର ଆହତ ହୋଇଥିଲେ। ଅକ୍ସିଜେନ୍ ବାହାର କରିଦେବା ହେତୁ ତାଙ୍କ ସ୍ୱାସ୍ଥ୍ୟ ଆହୁରି ଖରାପ ହେବାକୁ ଲାଗିଥିଲା। ଏହା ପରେ ତାଙ୍କ ଭାଇ ତୁରନ୍ତ ୧୧୨କୁ ଡାଏଲ କରି ଘଟଣା ସମ୍ପର୍କରେ ପୁଲିସକୁ ସୂଚନା ଦେଇଥିଲେ। ପରେ ଏହି ଘଟଣା ସାମ୍ନାକୁ ଆସିଥିଲା। ପୁଲିସ ତୁରନ୍ତ ଅନ୍ୟ ଆମ୍ବୁଲାନ୍ସକୁ ଡାକି ପୀଡିତାଙ୍କ ସ୍ୱାମୀଙ୍କୁ ଗୋରଖପୁର ମେଡିକାଲ କଲେଜରେ ଭର୍ତ୍ତି କରିଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି।
ଏହାକୁ ନେଇ ଲକ୍ଷ୍ନୌର ଗାଜିପୁର ପୁଲିସ ଷ୍ଟେସନରେ ଏକ ମାମଲା ରୁଜୁ ହୋଇଛି। ପୁଲିସ ମାମଲାର ତଦନ୍ତ ଜାରି ରଖିଛି। ପୀଡିତା ମହିଳା ଅଭିଯେଗ ଆଣିଛନ୍ତି ଯେ, ବସ୍ତିରେ ଉପସ୍ଥିତ ଥିବା ପୁଲିସ ମଧ୍ୟ ଆମ୍ବୁଲାନ୍ସ କର୍ମଚାରୀଙ୍କୁ ଗିରଫ କରିବା ପାଇଁ କୌଣସି ଉଦ୍ୟମ କରିନାହିଁ।
ସେପଟେ ଏହି ଘଟଣାକୁ ନେଇ ସମାଜବାଦୀ ପାର୍ଟି ମୁଖ୍ୟ ଆଖିଳେଶ ଯାଦବ ଉତ୍ତରପ୍ରଦେଶ ସରକାରଙ୍କୁ ନିନ୍ଦା କରିଛନ୍ତି। ଉତ୍ତରପ୍ରଦେଶରେ କେଉଁଠି ସରକାର ଅଛନ୍ତି ନା ନାହିଁ ବୋଲି ସେ ସୋସିଆଲ ମିଡିଆରେ ଏକ ପୋଷ୍ଟ ସେୟାର କରି ପ୍ରଶ୍ନ କରିଛନ୍ତି।
