ସମ୍ବିତ ପାତ୍ରଙ୍କୁ କାର୍ତ୍ତିକ ପାଣ୍ଡିଆନ ଦେଲେ ଉପଦେଶ , ତିନିଦିନ ଉପବାସରେ ନରହି ଭଲରେ ଖାଆନ୍ତୁ ..
1 min read
ପ୍ରଥମେ ଭୁଲ କହିଲେ ପରେ ମହାପ୍ରଭୁ ଜଗନ୍ନାଥଙ୍କଠାରୁ କ୍ଷମା ମାଗିଲେ ବିଜେପି ନେତା ସମ୍ବିତ ପାତ୍ର । ଏହି ଘଟଣା ପରେ ବିଜେଡି ନେତା ତଥା 5T ଅଧକ୍ଷ ଭିକେ ପାଣ୍ଡିଆନ ସିଧା ସଳଖ ସମ୍ବିତ ପାତ୍ର ଙ୍କୁ ଟାର୍ଗେଟ କରିଛନ୍ତି । ସେ କହିଛନ୍ତି ଯେ ସମ୍ବିତ ପାତ୍ର କହିବା ସମୟରେ ଯତ୍ନବାନ ହେବା ଉଚିତ୍ ଏବଂ ଠିକ୍ ଭାବରେ କହିବା ଉଚିତ୍। ପାଣ୍ଡିଆନ୍ କହିଛନ୍ତି ନିର୍ବାଚନର ତିନି ଦିନ ପୂର୍ବରୁ ସେ ନଖାଇ ନପିଇ ହତାଶ ହେବା ଉଚିତ୍ ନୁହେଁ। “ମୁଁ ଭାବୁଛି ସେ କହିବା ସମୟରେ ଯତ୍ନ ବାନ ହେବା ଉଚିତ୍ । ସେ ସଠିକ୍ ଭାବରେ କହିବା ଉଚିତ୍ । ନିର୍ବାଚନର ତିନି ଦିନ ପୂର୍ବରୁ ସେ ହତାଶ ହେବା ଉଚିତ୍ ନୁହେଁ। ସେ ଜଣେ ଡାକ୍ତର, ସେ କଣ କରିବା ଉଚିତ୍ ତାହା ନିହାତି ଜାଣିବା ଉଚିତ୍। ବିଜେଡି ଏହି ପ୍ରସଙ୍ଗକୁ ଆହୁରି ବଢାଇବ କି ବୋଲି ପଚରାଯିବାରୁ ସେ କହିଛନ୍ତି, ” ପ୍ରଭୁ ଜଗନ୍ନାଥ ସର୍ବଦା ଅନ୍ୟ ସମସ୍ତଙ୍କଠାରୁ ଉର୍ଦ୍ଧ୍ୱରେ ରହିବା ଉଚିତ୍। ଜଗନ୍ନାଥଙ୍କ ଉପରେ ରାଜନୀତି କରିବାକୁ ବିଜେଡି କେବେ ବିଶ୍ୱାସ କରେ ନାହିଁ ସେ ଆହୁରି କହିଛନ୍ତି ଯେ ବିଜେପି ଓଡିଆ ଅସ୍ମିତା ବିଷୟରେ କହୁଛି ଏବଂ ଭଗବାନ ଜଗନ୍ନାଥ ହେଉଛନ୍ତି ଓଡିଆ ଆସ୍ମିତାର ପ୍ରତୀକ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସର୍ବଦା ଅନୁଭବ କରିଛନ୍ତି ଯେ ଆମ ଭଗବାନଙ୍କୁ ରାଜନୀତି ବାହାରେ ରଖିବା ଉଚିତ୍।
ସୂଚନା ଯୋଗ୍ୟ ଯେ,ବିଜେପିର ପୁରୀ ଲୋକସଭା ପ୍ରାର୍ଥୀ ସମ୍ବିତ ପାତ୍ର ମୋଦିଙ୍କ ଗସ୍ତ ସମୟରେ ଏକ ନିର୍ଦ୍ଦିଷ୍ଟ ଗଣମାଧ୍ୟମକୁ ପ୍ରତିକିୟା ଦେବା ବେଳେ ମହାପ୍ରଭୁ ଜଗନ୍ନାଥଙ୍କ ମୋଦିଙ୍କ ଭକ୍ତ କହିଥିଲେ । ଯାହାକୁ ନେଇ ବିବାଦ ଉପୁଜିଥିଲା। ଏହାକୁ ନେଇ ସ୍ପଷ୍ଟୀକଣ ରଖିଛନ୍ତି ସମ୍ବିତ ପାତ୍ର। ଏମିତିକି ଉକ୍ତ ଭୁଲ ପାଇଁ ମହାପ୍ରଭୁଙ୍କ ଚରଣରେ ଦଣ୍ଡବତ ହୋଇ କ୍ଷମା ମାଗୁଛି ବୋଲି ସମ୍ବିତ ସୋସିଆଲ ମିଡିଆ ‘ଏକ୍ସ’ରେ ପ୍ରତିକିୟା ରଖିଛନ୍ତି। ଏହାସହ ଏଭଳି ଭୁଲର ପଶ୍ଚାତାପ ପାଇଁ ୩ ଦିନ ଉପବାସ ରହିବେ ବୋଲି ମଧ୍ୟ କହିଛନ୍ତି। ସମ୍ବିତଙ୍କ ଏଭଳି ମନ୍ତବ୍ୟ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏକ୍ସରେ ଏକ ପୋଷ୍ଟ କରି ଏହା ମହାପ୍ରଭୁଙ୍କ ପ୍ରତି ଅପମାନ ବୋଲି କହିଥିଲେ। ସେହିଭଳି କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ ମଧ୍ୟ ଏକ୍ସ’ରେ ଏହାକୁ ସମାଲୋଚନା କରିଥିଲେ। ସମ୍ବିତ ଏନେଇ ସ୍ପଷ୍ଟୀକରଣ ରଖିବା ସହ କ୍ଷମାପ୍ରାର୍ଥନା କରିଛନ୍ତି।
