ଟ୍ରେନରୁ ଡେଇଁପଡିଲେ ମହିଳା , ଦେବଦୂତ ସାଜି ରକ୍ଷା କଲେ ରେଲୱେ କନଷ୍ଟେବଳ …..
1 min read
ଭଦ୍ରକ ; ଯାହାକୁ ରଖିବେ ଅନନ୍ତ କି କରିପାରିବ ବଳବନ୍ତ । ଭଗବାନ କେଉଁ ରୂପରେ ଆସି ଯେ ବିପଦରୁ ଉଦ୍ଧାର କରନ୍ତି ତାହା କେବଳ ତା ଭକ୍ତଙ୍କୁ ହିଁ ଜଣା । ନିକଟରେ କିଛି ଏଭଳି ଘଟଣା ଭଦ୍ରକ ରେ ଷ୍ଟେସନରୁ ସାମ୍ନାକୁ ଆସିଛି । ଟ୍ରେନରୁ ଡେଇଁ ପଡିଥିବା ଜଣେ ମହିଳାଙ୍କୁ କିପରି ମରଣ ମୂଖରୁ ଟାଣି ଆଣିଛନ୍ତି କନଷ୍ଟେବଳ । ଭଦ୍ରକ ରେଳ ଷ୍ଟେସନରେ କାର୍ଯ୍ୟରତ କନେଷ୍ଟବଳଙ୍କ ଏଭଳି ଉଦାରତା ଦେଖି ଚାରିଆଡୁ ସାବାସୀର ସୁଅ ଛୁଟିଛି। ଏଭଳି ବଡ଼ ଅଘଟଣ ହେବା ପୂର୍ବରୁ କେଉଁଭଳି କନେଷ୍ଟବଳ ଜଣକ ମହିଳାଙ୍କ ଜୀବନ ବଞ୍ଚାଇଛନ୍ତି ତାହା ଭଦ୍ରକ ଷ୍ଟେସନ ପରିସରରେ ଥିବା ସିସିଟିଭିରେ କଏଦ ହୋଇଛି।
ଘଟଣାଟି ଏଭଳି ଥିଲା, ବାଲେଶ୍ୱର ଅଞ୍ଚଳର ଜୈନିକା ମହିଳା ଜଣକ ବାଲେଶ୍ୱର ଯିବା ନିମନ୍ତେ ମେମୁ ଟ୍ରେନକୁ ଅପେକ୍ଷା କରିଥିଲେ। କିନ୍ତୁ ଭୁଲବଶତଃ ଯାଜପୁର ଆଡକୁ ଯାଉଥିବା ଯାଜପୁର ପାସେଞ୍ଜର ଟ୍ରେନରେ ବସିଯାଇଥିଲେ। ଏହି ଟ୍ରେନଟି କେଉଁଆଡ଼ ଯାଉଛି ବୋଲି ଟ୍ରେନରେ ବସିଥିବା ଯାତ୍ରୀଙ୍କୁ ମହିଳା ଜଣକ ପଚାରିଥିଲେ। ଯାଜପୁର ଏହି ଟ୍ରେନଟି ଯାଉଥିବା ଶୁଣି ମହିଳା ଜଣକ ଅବାକ ହୋଇ ଚଳନ୍ତା ଟ୍ରେନରୁ ଡେଇଁପଡିଲେ।
ଆଉ ରେଳଧାରଣାକୁ ଖସିଯାଇଥିଲେ କିନ୍ତୁ ଏଭଳି ଅବସ୍ଥାରେ ଭଦ୍ରକ ରେଳ ଷ୍ଟେସନରେ ଡ୍ୟୁଟିରେ ଥିବା କନେଷ୍ଟବଳ ପ୍ରତାପ ଚନ୍ଦ୍ର ଗିରି ମହିଳାଙ୍କୁ କାବୁ କରି ପକାଇଥିଲେ ଓ ବଡ଼ ଅଘଟଣରୁ ମହିଳା ଜଣକ ବର୍ତ୍ତି ଯାଇଥିଲେ। କନେଷ୍ଟବଳଙ୍କ ଏଭଳି ସାହସିକତା କାର୍ଯ୍ୟକୁ ଦେଖି ଷ୍ଟେସନ ପରିସରରେ ଥିବା ଯାତ୍ରୀ ମାନେ କିଛି ସମୟ ପାଇଁ ତାଜୁବ ହେବା ସହ ସାବାସୀ ଦେଇଥିଲେ। ଭଦ୍ରକ ଷ୍ଟେସନ ପରିସରରେ ଏଭଳି ଅଘଟଣ ସିସିଟିଭିରେ କଏଦ ହୋଇଥିବା ବେଳେ ସାମାଜିକ ଗଣମାଧ୍ୟମରେ ଭାଇରଲ ହେବାରେ ଲାଗିଛି। ତେବେ ଏହି ଘଟଣାଟି କିଛି ଦିନ ତଳର ବୋଲି ଜଣା ପଡିଛି।
