ତାଲାବନ୍ଦ କଟକଣା ଉଲ୍ଲଙ୍ଘନ: ବ୍ରିଟେନ ପ୍ରଧାନମନ୍ତ୍ରୀ, ଅର୍ଥମନ୍ତ୍ରୀ ଦୋଷୀ
1 min read
ଲଣ୍ଡନ: କରୋନା ମହାମାରୀ ସମୟରେ ତାଲାବନ୍ଦ କଟକଣା ଉଲ୍ଲଙ୍ଘନ ଅଭିଯୋଗରେ ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନସନ ଓ ଅର୍ଥମନ୍ତ୍ରୀ ଋଷି ସୁନକ ଦୋଷୀ ସାବ୍ୟସ୍ତ ହୋଇଛନ୍ତି। ଏଥିପାଇଁ ଉଭୟଙ୍କ ଉପରେ କୋଭିଡ ନିୟମ ଅନୁଯାୟୀ ଜୋରିମାନା ଦଣ୍ଡାଦେଶ ଘୋଷଣା କରାଯିବ। ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟର ମୁଖପାତ୍ର କହିଛନ୍ତି ଯେ ଜୋରିମାନା ଦଣ୍ଡାଦେଶ ସମ୍ପର୍କରେ ମେଟ୍ରୋପଲିଟାନ ପୁଲିସ ପକ୍ଷରୁ ନୋଟିସ ଜାରି କରାଯାଇଛି। ଏ ସମ୍ପର୍କରେ ସବିଶେଷ ତଥ୍ୟ ମିଳି ନାହିଁ। ୨୦୨୦ ଜୁନ୍ରେ ତାଲାବନ୍ଦ ସମୟରେ ଡାଉନିଂଷ୍ଟ୍ରିଟ୍ସ୍ଥିତ କ୍ୟାବିନେଟ୍ କୋଠରିରେ ଜନସନଙ୍କ ଜନ୍ମଦିନ ଉତ୍ସବ ପାଳନ କରାଯାଇଥିଲା। ତାଲାବନ୍ଦ ନିୟମ ଉଲ୍ଲଙ୍ଘନ ପୂର୍ବକ ଭୋଜିର ଆୟୋଜନ ହୋଇଥିଲାବେଳେ ଏଥିରେ ମଦ ପରିବେଷଣ କରାଯାଇଥିଲା। ପ୍ରାୟ ୧୨ଟି ଭୋଜିରେ ମନ୍ତ୍ରିମଣ୍ଡଳ ସଦସ୍ୟଙ୍କ ସହ ଅଧିକାରୀମାନେ ଆପ୍ୟାୟିତ ହୋଇଥିଲେ। ଏପରିକି ୨୦୨୦ ଓ ୨୦୨୧ରେ ପ୍ରଧାନମନ୍ତ୍ରୀ ଓ ତାଙ୍କ କର୍ମଚାରୀମାନେ ଡାଉନିଂଷ୍ଟ୍ରିଟ୍ରେ ୪ଟି ଉତ୍ସବ ଆୟୋଜନ କରିଥିଲେ। ଏହି ଘଟଣାରେ ବିରୋଧୀ ଦଳ ପ୍ରଧାନମନ୍ତ୍ରୀଙ୍କ ଇସ୍ତଫା ଦାବି କରିଥିଲେ।
